Kryeministri Edi Rama është përplasur live me një gazetare të Fax News gjatë konferencës së këtij të fundit në Rinas pas kthimit nga Samiti i Sofjes.
Pas debatit me gazetaren në lidhje me ministrin e Brendshëm Fatmir Xhafaj, kryeministri Rama ka ndërprerë fjalën duke i thënë gazetares eja këtu dhe mbaro ti konferencën e shtypit të thuash fjalën e fundit.
Pyetja e gazetares: Si ndiheni kur dy persona që u keni besuar ministrinë më të rëndësishme, i pari në arrest shtëpie për trafik droge, dhe i dyti akuzohet se ka mbrojtur të vëllain. A nuk ka në PS përfaqësues që nuk kanë kushërinj ose vëllezër që merren me trafik droge që mund ta drejtonin këtë ministri?
Edi Rama: Së pari, janë dy gjëra krejtësisht të ndryshme. Së dyti pyet pronarin se dhe ai ka një vëlla. A do ishte i gatshëm ai pronari juaj, të jepte llogari për vëllanë e tij. (Pronari i FaxNews është Kasem Hysenbelliu, ndërsa vëllai i tij është Irfan Hysenbelliu, pronar mes të tjerash i Neëws 24 dhe gazetës Panorama).
Gazetarja: Unë po ju pyes juve, sepse jeni kryeministër që qeverisni vendin
Rama: Më falni, nuk jemi duke bërë debat. Ju më bëtë pyetjen, unë po ju jap përgjigjen. Ju kërkoni përgjigje nga unë dhe përgjigjja ime është kjo: Pyesni pronarin tuaj dhe thuajini që a ka ai vetë ndonjë përgjegjësi për vëllain, se janë edhe në të njëjtën fushë të dy.
Gazetarja: Pronari im nuk ka lidhje me rendin dhe qeverisjen e vendit. Nuk e gjej krahasimin tuaj me vend. Unë ju pyeta se pse duhet të jetë kaq e diskutueshme një Ministri, pse duhet të kemi gjithmonë Ministra që implikohen në këtë çështje për shkak se është nga Ministritë më të rëndësishme të vendit. Kështu që nuk e gjej krahasimin tuaj me vend për pronarët e televizioneve që nuk lidhen me qeverisjen e vendit.
Rama: Kurse unë e gjej krejt pa etikë që ju vini këtu gazetare për të bërë pyetje dhe merrni mikrofonin për të bërë propagandë. Kjo është pa etikë.
Gazetarja: Nuk është propagandë se kemi dy ministra të akuzuar për trafik droge… nuk mund të pranoj që të thoni se është propagandë.
Rama: Unë jam respektues…
Gazetarja: Dhe unë jam respektuese po nuk mund të pranoj që po bëj propagandë se nuk është propoagandë po thjesht një pyetje
Rama: Hajde këtu dhe mbaro konferencën e shtypit të thuash fjalën e fundit. Mirupafshim!
