Rrjeti social Facebook ka konfirmuar faktin që shefi ekzekutiv do të takohet me krerët më të lartë të Parlamentit Europian për të diskutuar mbi shqetësimet mbi privatësinë në Bruksel.
Data e takimit me Mark Zuckerbergun nuk është përcaktuar ende, por presidenti i Parlamentit Europian tha se shpresonte që të ndodhte javën e ardhshme.
Bisedimet do të zhvillohen gjithsesi me dyer të mbyllura, në Konferencën e Presidentëve, ku marrin pjesë edhe udhëheqës të grupeve të ndryshme politike. Pas kësaj vizite do të zhvillohet edhe një dëgjesë publike, që parashikohet të ndodhë në qershor, ku do të thirren ekzekutivë të tjerë të Facebookut.
Rrjeti social u përfshi nga një skandal me shkeljen e privatësisë së të dhënave të miliona përdoruesve, të cilat ishin përdorur nga kompania e konsulencës politike, “Cambridge Analytica”, me seli në Londër, e cila pas skandalit ka njoftuar edhe mbylljen e biznesit.
Më 23 maj, Zuckerbergun do ta presë në Paris edhe presidenti francez, Emmanuel Macron. Zyra e këtij të fundit njoftoi se të dy ata do të zhvillojnë bisedime mbi privatësinë e të dhënave dhe taksat. Në samitin në pallatin “Elysee” do të marrin pjesë edhe krerët e Microsoftit, Intelit dhe IBM-së.
