Në Gjykatën e Krimeve të Rënda po zhvillohet që prej orës 14.00 seanca në ngarkim të 13 personave të ndaluar 2 ditë më parë, të njohur të gjithë si banda e Met Kananit. Ata pritet të njihen me masën e sigurisë “arrest me burg”, të kërkuar nga Prokurorja e çështjes Elisabeta Imeraj dhe të vendosur tashmë nga gjykata e shkallës së parë të krimeve të rënda.
Gjate operacionit të përbashkët policor të koduar “Preçizioni”, prokuroria e krimeve të rënda dhe Policia e Shtetit vuri në pranga në disa qytete të vendit 13 shtetas. Së bashku me Met Kananin, kreu i dyshuar i grupit dhe 4 të tjerë që ndodhen aktualisht në burg në Turqi apo Maqedoni, shkon në 18 numri i personave të arrestuar si pjesëtarë të dyshuar të kësaj bande kriminale.
Këta persona vepronin si grup i strukturuar kriminal, për trafikimin e lëndëve narkotike. Veprimtarinë kriminale e ushtronin në Shqipëri dhe në vende të tjera, kryesisht ato të Bashkimit Europian.
Ka dyshime se ky grup kriminal vepronte në linjat e trafikimit të heroinës, Turqi – Greqi – vendet e BE, si dhe Turqi – Maqedoni – Shqipëri – vendet e BE.
Një tjetër aktivitet kriminal, i zbuluar nga hetimet ishte trafikimi i kokainës nga vendet e Amerikës Latine përmes vendeve të Ballkanit në Shqipëri dhe vendet e BE-së. /abcnews.al
