Klodian Braho, është caktuar prokurori që do të hetojë dosjen e ish-kryeprokurorit Adriatik Llalla, e cila eshtë regjistruar pranë Krimeve të Rënda, pasi u hetua fillimisht nga Prokuroria e Durrësit.
Dosja ndaj Adriatik Llallës mban Nr. 447 dhe në të janë grumbulluar prova e fakte që deri tani e eimplikojnë ish Kryeprokurorin e Republikës për 4 akuza të cilat mbetet që të vërtetohen zyrtarisht: “Mosdeklarim të të hollave në kufij”, “Pastrim parash”, “Shpërdorim detyre” dhe fshehje të pasurisë.
Po kush është Klodian Braho?
Prokurori i njërë prej çështjeve më të bujshme që po hetohet aktualisht, ka qenë më parë fillimisht prokuror në Prokurorinë pranë Gjykatës së Shkallës së Parë të Vlorës.
Me dekretin nr. 9431 të 18 shkurtit 2016, Klodian Braho është dekretuar nga Presidenti i Republikës i asaj kohe, Bujar Nishani si Prokuror në Prokurorinë pranë Gjykatës së Shkallës së Parë për Krimet e Rënda.
Që nga ajo kohë e deri më sot z. Braho ka vijuar të ushtrojë detyrën e prokurorit në këtë institucion i cili deri dy ditë më parë drejtohej nga Kryeprokurori për Krimet e Rënda Besim Hajdarmataj. Aktualisht ky institucion drejohet nga Donika Prela që u emërua nga Kryeprokurorja e Përgjithshme, Arta Marku.
Dekreti Nishanit
Në dekretin e emërimit të Klodian Brahos në detyrën aktuale thuhet:
Në mbështetje të nenit 93 të Kushtetutës, si dhe të neneve 8, pika 2, gëma “c”, dhe 21, pika 2 dhe 3, të ligjit nr.8737, datë 12.02.2001 “Për organizimin dhe funksionimin e Prokurorisë në Republikën e Shqipërisë”, të ndryshuar, me propozim të Prokurorit të Përgjithshëm,
D e k r e t o j
Neni 1
Zoti Klodian Braho, aktualisht prokuror në Prokurorinë pranë Gjykatës së Shkallës së Parë Vlorë, emërohet prokuror në Prokurorinë pranë Gjykatës së Shkallës së Parë për Krimet e Rënda.
Neni 2
Ky dekret hyn në fuqi menjëherë.
Nr. Dekretit 9431
Tiranë, më 18 Shkurt 2016
Presidenti
Bujar Nishani
Si u përzgjodh Klodian Braho nga Adriatik Llalla
Në listën e te dekretuarve nga Nishani, përveç Klodian Brahos ishte edhe prokurori i rrethit Lushnje, Arenc Çela, dhe dy prokuroret Pranvera Hoxha dhe Sonila Muhametaj.
Të katër prokurorët në listë ishin propozuar për emërim në Prokurorinë e Krimeve të Rënda me propozim të Këshillit të Prokurorisë i cili i kaloi Kryeprokurorit Adriatik Llalla. Më pas ishte Llalla ai që kishte të drejtën ti dërgonte ose jo pë dekretim në Presidencë propozimet e Këshillit të Prokurorisë së Përgjithshme.
Ky është organizmi i vetëm që sipas ligjit të shkuar, përpara se të bëhej reforma në drejtësi që ka patur të drejtën e përzgjedhjes së kandidaturave të prokurorëve që lëvizin apo ngrihen në detyrë. Vendin e këtij Këshilli tani do ta zerë Këshilli i Lartë i Prokurorisë (KLP) që nuk është ngritur ende.
Këshilli i Prokurorisë së Përgjithshme e ka shqyrtuar atëherë emrin e Klodina Brahos mes 23 kandidaturave të prokurorëve që kanë kërkuar transferim dhe ai u përzgjodh mes katër emrave që iu dërguan Prokurorit të Përgjithshëm.
Llalla përveç Krimeve të Rënda hetim edhe nga vettingu
Me 16 maj Llalla de para Kolegjit të Posaçem të Apelimit në seancë dëgjimore për hetimin administrativ që po i bëhet gjithë prokurorëve dhe gjyqtarëve të sistemit të vjetër të drejtësisë.
Në dispozicion të Kolegjit janë vënë deklaratat e pasurisë së Llallës dorëzuar në ILDKPKI. Gjithashtu, janë marrë nga hipotekat të gjitha dokumentacionet për pasuri të paluajtshme.
Përgatiti: Alpenews.al
