Ekstradohet në Shqipëri Izet Haxhia. Ish-bodigardi i Sali Berishës ka zbritur në aeroportin e Rinasit në orën 20:10 minuta të mbrëmjes së sotme. Pas mbërritjes në aeroport, ai po shoqërohet nga Rinasi për në paraburgimin e 313, ndërsa brenda 48 orëve ai do të dalë para gjykatës.
Izet Haxhia ekstradohet sot nga Turqia, detajet e para për pritjen dhe dërgimi në burg
Izet Haxhia pritet të ekstradohet nga Turqia, mbrëmjen e sotme, ku parashikohet që në orën 20:00 do të mbërrijë në aeroportin e Rinasit. Ai u vetëdorëzua disa ditë më parë në policinë turke.
Ai do të pritet nga një punonjës i Drejtorisë së Policisë së Tiranës e nga grupi i gatshëm i burgjeve, dhe më pas do të dërgohet në burgun 313, ku do të vuaj dënimin prej 25 vitesh burg për vrasjen e Azem Hajdarit. Ministria e Drejtësisë ka garantuar rihapjen e dosjes së Izet Haxhisë.
Izet Haxhia, ish-truproja e Sali Berishës, do të ekstradohet pas kërkesës së gjykatës shqiptare dhe vetëdorëzimit të tij në policinë turke.
Izet Haxhia u arrestua në vitin 2006 në Turqi, por drejtësia turke nuk ishte shprehur ende për ekstradimin e tij, ndonëse pala shqiptare kishte bërë kërkesa të vazhdueshme në kohën kur në pushtet ishte Sali Berisha.
Për 12 vjet me radhë gjykata turke kishte urdhëruar thjesht që ai të mos largohej jashtë vendit, ndërsa në shkurt të këtij viti befas u mor vendimi që ai të ekstradohet. Izet Haxhia është dënuar nga gjykata shqiptare me 25 vite burg për vrasjen e Azem Hajdarit, akuzë të cilën ai nuk e ka pranuar kurrë. Ekstradimi i tij në Shqipëri mund të çojë në hapjen e dosjes ‘Hajdari’.
