Pas incidentit të ndodhur sot në varrezat e Dëshmorëve të Kombit, ku disa persona goditën disa të tjerë të cilët mbanin në duar fotot e Enver Hoxhës, ka reaguar edhe Astrit Patozi.
Ky i fundit përmes një postimi të bërë në Facebook, shkruan se është “gjithmonë kundër çdo lloj dhune, pavarësisht kush e ushtron dhe pavarësisht mbi kokën e kujt bie. Por nëse duhet të zgjedh patjetër mes atyre që dalin të manifestojnë më 5 maj me fotografinë e Enver Hoxhës, dhe të tjerëve që u qëllojnë atyre me shkopinj, unē preferoj të dytët”.
Postimi i plote:KËSHILLË PËR ATA QË E HËNGRËN NGA FOTO E ENVER HOXHËS
Unë jam gjithmonë kundër çdo lloj dhune, pavarësisht kush e ushtron dhe pavarësisht mbi kokën e kujt bie.
Por nëse duhet të zgjedh patjetër mes atyre që dalin të manifestojnë më 5 maj me fotografinë e Enver Hoxhës, dhe të tjerëve që u qëllojnë atyre me shkopinj, unē preferoj të dytët.
Sepse rastin e parë e konsideroj dhunë më të madhe, që i bëhet publikut shqiptar, kur ende nuk janë tharë plagët e diktaturës komuniste.
Kurse atyre që u lënduan, do t’u sugjeroja që herën tjetër kur të shkonin në Varrezat e Dëshmorëve të mbanin në duar portretin e Edi Ramës, dhe do ta kishin më të lehtë.
Edhe mesazhin që donin të përcillnin do ta kishin dhënë njësoj, por edhe do t’i kursenin vetes drurin.
