Presidenti italian Serxho Matarela po shqyrton mundësinë e krijimit të një qeverie të përkohshme për të shmangur zgjedhjet e parakohshme në Itali. Sipas mediave italiane, kjo është zgjidhja që kreu i shtetit pritet t’i japë të paktën përkohësisht krizës politike ku është zhytur vendi që prej zgjedhjeve parlamentare të 4 Marsit, ku asnjë grupim politik nuk siguroi vota të mjaftueshme për të qeverisur.
Kreu i Lëvizjes 5 Yjet, Luixhi Di Maio propozoi zgjedhje të parakohshme në Qershor, pasi Mateo Renzi kryetari i dorëhequr i Partisë Demokratike refuzoi ftesën e tij për një qeveri të përbashkët.
Vendimi i Renzit përçau edhe vetë demokratët, një pjesë e të cilëve janë pro-bashkëpunimit me Lëvizjes 5 Yjet. Por në një intervistë pak ditë më parë, Renzi tha se demokratëve nuk u takon të jenë pjesë e qeverisë së ardhshme, pasi më 4 Mars populli votoi për t’i nxjerrë ata në opozitë.
Një nga mundësitë që mbetet ende për t’u diskutuar është edhe propozimi i ish-Kryeministrit italian Silvio Berluskoni, që qendra e djathtë të krijojë një qeveri minorancë, të mbështetur nga opozita.
Tv Klan
