Një aksident tragjik i ka marrë jetën një shqiptari në Pistoia të Italisë.
Viktima është 50-vjeçari Nikolin Gjeka. Sipas mediave italiane, shqiptari nuk llogariti vendin ku do të binte një pemë, të cilën sapo e kishte prerë dhe gjeti vdekjen pasi trungu i madh e zuri poshtë.
50-vjeçari u gjet rreth orës 6 të mëngjesit të sotëm, në një pyll mes Campiglio dhe Celo, në rrugën Vecchia di Campiglio.
Mediat fqinje shkruajnë se Gjeka kishte dalë pasditen e djeshme për të marrë dru në pyll, sëbashku me veglat e punës.
Duke qenë se nuk ishte kthyer në shtëpi në mbrëmje, bashkëshortja e tij ishte alarmuar kishte njoftuar karabinierët.
Këta të fundit kërkuan gjatë natës në zonën ku kishte shkuar. Ata gjetën fillimisht makinën e 50-vjeçarit dhe për shkak të errësirës i ndërprenë kërkimet për të rifilluar në mëngjes.
Dhe ishte pikërisht në orët e para të mëngjesit kur 50-vjeçari u gjet nën një pemë që kishte prerë me motosharrë.
Gjeka la pas bashkëshorten dhe dy fëmijë. Ai mësohet se merrej pikërisht me prerjen e druve dhe punonte edhe si kopshtar.
