ANALIZA/ Është vendosur ora 11:00 për nisjen e seancës për masën e sigurisë për gjyqtarin e akuzuar për “Korrupsion pasiv”, Shkëlqim Miri. Ironia e fatit donte që kolegët e tij ta gjykojnë dhe të japin vendim për gjyqtarin e akuzuar. Masa e sigurisë do të jepet tek gjykata e Krimeve të Rënda. Prokurori i çështjes është Ardian Braho, ku ky i fundit ka kërkuar arrest me burg për gjyqtarin Miri.Kurse Ardian Visha është avokati mbrojtës i gjyqtarit Miri. Gjyqtarja që do të shqyrtoj dosjen është përzgjedhur Daniela Shirka.
Si ka ndodhur ngjarja:
Gjyqtari Shkëlqim Miri pas verifikimeve të bëra nga policia në banesën e tij ku i janë gjetur 300 milion lekë, është ndaluar nga policia e shtetit. Me kërkesë të Prokurorisë së Krimeve të Rënda u ushtrua kontroll në banesë dhe iu gjetën rreth 300 milionë lekë të vjetra. Dyshohet se gjyqtari Miri ka ndryshuar akuzën nga vrasje në plagosje të rëndë. Ndalimi i gjyqtarit momentalisht është për akuzën e korrupsionit. Momentalisht Shkëlqim Miri ndodhet në rajonin e policisë. Nën hetim janë edhe familjarët por ende nuk ka një masë për ta. Mësohet se Prokuroria e Përgjithshme ka nisur një hetim prej gati një viti ndaj Mirit, ndërsa gjatë kontrollit atij i janë gjetur në banesë një shumë prej 20 mijë eurosh, që dyshohet të jenë marrë në këmbim për të ndryshuar kualifikimin e një vrasjeje të ndodhur në Burrel, në vitin 1997. Por po kështu gjytari ka thënë se një pjesë e parave janë të kushëririt të tij.
Përgatiti: AlpeNews.al
