Bashkëpunimi me opozitën për NEGOCIATAT/ Balla zbulon nismën e re të PS… (VIDEO)

I pyetur gjatë një interviste në ERTV nëse Partia Socialiste do të bashkëpunojë me opozitën përmes një aksioni të përbashkët për të bindur vendet anëtare të BE mbi çeljen e negociatave të anëtarësimit me Shqipërinë, Taulant Balla pohon se mazhoranca mbetet e gatshme t’i shtrijë dorën e bashkëpunimit opozitës.

Balla zbuloi për herë të parë në ERTV se shumë shpejt do të depozitohet në Kuvend një rezolutë në emër të grupit parlamentar të Partisë Socialiste për mbështetjen e procesit të integrimit europian, falë së cilës do të ndërtohet një klimë tjetër politike.

“Partia Socialiste dhe Kryeministri kanë qënë shumë të qartë që në ditën kur morëm raportin e Komisionit Europian, se jemi të gatshëm të shtrijmë dorën e bashkëpunimit me opozitën në funksion të një përpjekjeje të përbashkët, për të përmbushur pritshmëriteë. Ne i kemi besuar opozitës dy institucione të monitorimit të integrimit si Këshilli Kombëtar për Integrimin Europian dhe Komisionin për Integrimin, sikurse do të doja të thoja që do të depozitojmë një rezolutë në emër të grupit parlamentar të Partisë Socialiste për mbështetjen e procesit të integrimit europian, një apel drejtuar gjithë vendeve anëtare për sa i përket vendimarrjes së tyre për hapjen e negociatave dhe përmes kësaj rezolute duam të ndërtojmë një klimë tjetër politike, favorizuese për këtë fazë të rëndësishme.”