Masa e sigurisë “arrest me burg”, në mungesë, dhënë nga Gjykata e Krimeve të Rënda për Bledar Jambellin, i akuzuar për vrasjen e Artan Cukut, është mbështetur në tri prova kryesore.
E para, nga e cila është marrë edhe indicia kryesore e grupit hetimor, ka qenë dëshmia e Mikel Shallarit, i arrestuar qershorin e vitit të kaluar si person që kishte rolin e ekzekutorit. Nisur nga kjo dëshmi, janë përdorur si prova edhe dy kërcënime që ish-drejtori i Policisë së Vlorës kishte marrë nga 38-vjeçari Bledar Jambelli.
I pari ka qenë kërcënim direkt në zyrën e Cukut, në momentin kur Jambelli është arrestuar prej tij, ndërsa kërcënimi i dytë indirekt, pasi oficerët e Policisë kanë konstatuar emrin e Cukut të shkruar në faqet e murit të qelisë ku ka qëndruar Jambelli.
Këto tri argumentime janë parashtruar nga prokurori i çështjes në seancën e masës së sigurisë,që është zhvilluar më datë 12 qershor të vitit 2017 dhe janë pranuar nga Gjykata e Krimeve të Rënda, që vendosi “arrest me burg”. Bledar Jambelli, nga Mbrostari i Fierit, pas këtij vendimi është shpallur në kërkim ndërkombëtar me një vendim të datës 18 prill 2018.
KERCENIMET
Vrasja e Artan Cukut është kryer për shkak të detyrës. Për këtë nuk ka më asnjë dyshim. Kjo lidhet me kërcënimet për jetën që ai kishte marrë në kohën kur drejtonte Policinë e Vlorës. Kërcënimet erdhën për shkak të rihapjes së një dosjeje të vjetër, që solli arrestime të tjera. Personi që u arrestua në vitin 2012 pas vrasjes së Amarildo Delajt, ishte Bledar Jambelli.
E pas arrestimit për këtë vrasje, gjatë një operacioni që u drejtua nga vetë Artan Cuku, u gjetën prova të reja që e përfshinin Jambellin edhe në dy vrasje të ndodhura në vitin 2006. Ky ishte momenti kur Artan Cuku u kërcënua me jetë nga Jambelli, i cili i tha në zyrë se nuk do ta harronte kurrë këtë ditë. Kërcënimet vazhduan edhe pasi Bledar Jambelli u izolua në një qeli në Burgun e Rrogozhinës.
Madje, në lidhje me këtë rast ai u mor në pyetje në ambientet e burgut nga oficerët e Krimeve të Rënda. Por ajo që u konstatua në qelinë e Jambellit, e bënte edhe më serioz kërcënimin ndaj ish-drejtuesit të lartë të Policisë. Emri i Artan Cukut ishte shkruar me dhjetëra herë në muret e qelisë. Por shkrimet në mure nuk u fotografuan, në mënyrë që të përdoreshin si provë.
