Dy ditë pas sulmit antisemit ndaj një izraeliti të ri dhe shoqëruesit të tij në Berlin, i dyshuari si doras i është dorëzuar policisë. Në mesditën e së enjtes, 19 vjeçari u paraqit në Zyrën e Policisë Kriminale të Landit i shoqëruar nga një avokate, bëri të ditur një zëdhënës i policisë. Bëhet e ditur se i dyshuari si doras është një refugjat nga Siria. Sipas agjencisë së lajmeve dpa, atë e hetuan midis të tjerash në bazë të të dhënave të dëshmitarëve. Se prej sa kohësh ndodhet në Gjermani dhe ku jeton ai, këtë policia për momentin nuk e ka bërë të ditur. Prokuroria e Berlinit kërkoi që të enjten që ai të paraqitet para gjykatësit, për t’i shqiptuar arrestin.
Izraeliti 21 vjeçar dhe shoku i tij po ecnin të martën pasdite në lagjen e Berlinit, Prenzlauer Berg duke mbajtur në kokë kapelen tradicionale të hebrenjve, kipan. Ata i sulmoi një grup meshkujsh që flisnin arabisht dhe i shau me sharje antisemite. Njëri nga të rinjtë e goditi 21 vjeçarin me rripin e pantallonave dhe u përpoq ta godiste edhe me shishe. Sulmuesi dhe dy shoqërues të tij morën arratinë. 21 vjeçari e filmoi sulmin dhe e nxorri videon në internet.
Në intervistë me DW, i riu me emrin Adam (mbiemrin ai nuk donte ta thoshte), tha se nuk është hebre dhe se është rritur në një familje arabe në Izrael. Ai e pati vënë në kokë kipan, pasi shokët i patën thënë se është e rrezikshme ta mbash atë hapur në rrugët e Gjermanisë. Me veprimin e tij ai kishte dashur të tregonte se nuk është e rrezikshme. “Ishte një përvojë e mbajtjes së kipas”, i tha ai DW.
