Surpriza e parë e madhe për reformën në drejtësi e për atë që konsiderohet si filtri gati i pakalueshem për shumicën e 800 gjyqtarëve dhe Prokurorëve të Shqipërisë. Prokuroria rrëzon “Vettingun” për Gjyqtarin Besnik Ymeraj. Nuk fillon hetimet.
Komisioni i Pavarur i Kualifikimit (KPK), ose shkalla e parë e vettingut e kishte ndërprerë procesin administrativ të kontrollit të ish anëtarit të Gjykatës Kushtetuese Besnik Ymeraj. Shkak ishte bërë dorëheqja e tij.
Megjithatë KPK e çoi në prokurori për verifikimin penal të pasurisë së Ymerajt meqë ajo sipas një vendimi të Gjykatës Kushtetuese ishte e detyruar që ta ndërpriste procesin kur subjekti del me vullnetin e vet nga sistemi i drejtësisë, me anë të dorëheqjes.
Pas verifikimeve të bëra Prokuroria me sa duket nuk ka gjetur elementë për ta regjistruar zyrtarisht e për të nisur procedimin penal ndaj Ymeraj, i cili tani është një qytetar i lirë për të vijuar pa detyrime ndaj drejtësisë, jetën dhe aktivitetin e tij.
ÇFARE KISHTE NDODHUR ME PARE?
Komisioni i Pavarur i Kualifikimit ndërpreu procedurën e vetingut për gjyqtarin e Kushtetueses, Besnik Imerajt pasi ky i fundit dha dorëheqjen.
Komisioni i Pavarur i Kualifikimit, KPK ndërpreu procedurën e rivlerësimit kalimtar për anëtarin e Gjykatës Kushtetuese, Besnik Imeraj për shkak se ky i fundit dha dorëheqjen nga pozicioni i tij më 31 janar 2018 dhe e motivoi atë “me arsye personale dhe shëndetësore”.
Sipas vendimit që KPK mori më 12 shkurt, dorëheqja e gjyqtarit sjell edhe ndërprerjen e procesit të vetingut.
Sipas komisionit, vendimi është në zbatim të nenit G të Aneksit të Kushtetutës, i cili thotë se: “subjekti i rivlerësimit mund të japë dorëheqjen nga detyra dhe në këtë rast procesi i rivlerësimit ndërpritet”.
Imeraj ishte ndër të parët gjyqtarë që u përfshi në procesin e vetingut për shkak të pozicionit të tij: përveçse anëtar i Gjykatës Kushtetuese ai u zgjodh me short edhe si anëtar i Këshillit të Emërimeve në Drejtësi.
Besnik Imeraj ka një karrierë të gjatë dhe të diskutueshme në sistemin shqiptar të drejtësisë. Ai u emërua anëtar i Gjykatës Kushtetuese në mars të vitit 2013, pas një mandati 8 vjeçar në Gjykatën e Lartë. Në vitet 2000-2006, Imeraj ka qenë edhe anëtar i Këshillit të Lartë të Drejtësisë.
Si anëtar i Gjykatës së Lartë, Imeraj ka qenë anëtar apo kryesues i çështjeve të rëndësishme gjyqësore si tragjedia e Gërdecit apo çështja e rrugës Durrës-Kukës. Në të dyja rastet, akuzat u pushuan si për ish-ministrin e Mbrojtjes, Fatmir Mediu ashtu edhe për ish-ministrin e Transporteve, Lulzim Basha.
Pavarësisht pozicioneve të larta në të shkuarën, Imeraj është i detyruar të qëndrojë jashtë sistemit për një periudhë 15-vjeçare.
“Subjekti i rivlerësimit që dorëhiqet sipas kësaj dispozite, nuk mund të emërohet gjyqtar ose prokuror i çdo niveli, anëtar i Këshillit të Lartë Gjyqësor ose i Këshillit të Lartë të Prokurorisë, Inspektor i Lartë i Drejtësisë ose Prokuror i Përgjithshëm, për një periudhë 15-vjeçare,” thuhet në pikën G të aneksit të Kushtetutës.
Alpenews.al
