Një 27-vjeçar ka mbetur i plagosur gjatë një sherri në zonën e Bllokut, ku janë nxjerrë armët dhe është qëlluar. Mësohet se ngjarja ka ndodhur në një lokal nate. 27-vjeçari Erlis Duka ka mbetur i dëmtuar nga goditjet me grushte. Policia ka shoqëruar 15 persona, por ende nuk ka emrat e autorëve.
Ndërkohë në Tiranë… Të shtëna me armë.
Posted by JETA OSH QEF on Donnerstag, 9. November 2017
Një dëshmitar ka dërguar në “BalkanWeb” një video nga vendi i ngjarjes duke rrëfyer edhe si ndodhi ngjarja. Ndonëse policia foli për një të lënduar, ai thotë se janë plagosur dy persona dhe se policia ka mbërritur 10 minuta me vonesë.
“Përballë Sky Tower ka ndodhur një përplasje me armë. Janë plagosur dy veta, kanë qëlluar me armë. Ndërkohë policia po kërkon. Gëzhojat janë shpërndarë, kanë shkelur edhe mbi gjurmët. Mund të kenë qenë 2-3 persona. Policia ka ardhur 10 minuta me vonesë. Ambulanca tani erdhi”, raporton dëshmitari pak minuta pas ngjarjes për “BalkanWeb”.
Njoftimi i policisë:
Më datë 10.11.2017, rreth orës 01:05, në Sallën Operative ka ardhur një telefonatë se në rrugën “Brigada e 8″ ka një konflikt dhe ka të shtëna me armë zjarri.
Menjëherë shërbimet e Policisë kanë shkuar në vendngjarje ku nga verifikimet paraprake rezultoi se :
Në rrugën ” Brigada e 8″, ka pasur një konflikt mes disa të rinjsh.
Si pasojë e konfliktit ka mbetur i dëmtuar shtetasi E.D., 27 vjeç, banues në Tiranë, i cili nuk ka dëmtime me armë zjarri, por dyshohet të jetë dëmtuar nga goditje me grusht.
Shtetasi E.D., është dërguar për ndihmë mjekësore, ku më pas është arrestuar për veprën penale “Moskallëzim Krimi”.
Gjatë konfliktit njëri prej shtetasve të përfshirë në konflikt ka qëlluar me armë zjarri në ajër.
Në vendngjarje janë gjetur dhe sekuestruar në cilësinë e provës materiale dy gëzhoja arme zjarri.
Janë shoqëruar në ambientet e policisë 15 persona për sqarime dhe verifikime të mëtejshme.
Grupi hetimor po punon për zbardhjen e plotë të rrethanave të ngjarjes, identifikimin dhe kapjen e autorëve.
