Është shuar në moshë të re krejt papritur si rezultat i një sëmundjeje të rëndë e të pakurueshme punonjësja e bashkisë së Durrësit, Ada Kalaja, e cila shërbente në sallën e pritjes së qytetarëve.
Të gjithë qytetarët e Durrësit që i janë drejtuar bashkisë, në sallën e pritjes janë pritur nga Ada Kalaja deri dje.
Humbja tragjike e jetës brenda pak javësh ka tronditur jo vetëm administratën e bashkisë por të gjithë rrethin miqësor e shoqëror të saj:
Në bashkinë e Durrësit që prej dje kur u mësua lajmi, ishte vënë kuja ndërsa sot kryhej ceremonia e varrimit, raporton “Durreslajm”.
Vajza me shpirt artisti kishte përfunduar për pikturë, dhe prej disa vitesh punonte në bashkinë e Durrësit, ndërsa pas pune ushtrohej në dhomë duke derdhur në telajo shpirtin saj.
Shoqet dhe mikeshat e saj të tronditura janë shprehur se kanceri i gjirit e ndau shumë shpejt nga familja e ëndrrat e rinisë, nga puna e nga peneli të cilin e konsideronte dashuri të shpirtit.
“Para dy muajsh kishte kryer analizat dhe sëmundja kishte përparuar shumë.
Nëna e saj u mundua të mos ia thoshte duke shpresuar në mrekulli deri dje kur zoti e thirri pranë vetes,” thanë mikeshat e saj me lot në sy.
