Pas Kosovës, presidenti turk Recep Tayyip Erdogan thumbon edhe Greqinë për çështjen e dorëzimit të ‘gylenistëve’. Por ndryshe nga kërcënimet ndaj Haradinajt, me Ciprasin çështja është shumë më e komplikuar.
Kryeministri grek iu përgjigj me një komunikatë për shtyp presidentit turk, i cili të dielën i kërkoi që 8 ushtarët turq të arratisur në Greqi pas grushtit të dështuar të shtetit, të këmbeheshin me 2 ushtarët grekë të arrestuar nga Turqia. Përgjigjja e Ciprasit ishte se si kryeministër i vendit nuk mund të dilte mbi ligjet dhe procedurat e drejtësisë greke. Cipras thotë se nuk është Sulltan që të dalë mbi vendimet e gjykatës për të mbajtur premtimet e tij.
I veshur me uniformë ushtarake gjatë një vizite në një bazë ushtarake në Hataj pranë kufirit sirian, Erdogan tha se Greqia dhe Europa po shtojnë presionin ndaj Turqisë për të liruar ushtarët grekë e kapur rreth një muaj më parë në zonën e diskutueshme kufitare me turko-greke pranë Edirnesë. Erdogan tha se 8 ushtarët turq të akuzuar si pjesëmarrës në grushtin e shtetit të korrikut 2016, të organizuar nga kleriku në arrati Fetullah Gylen duhet të japin llogari pasi tentuan ta vrisnin.
