Ndërkohë që vijon retorika e ashpër mes Greqisë dhe Turqisë për një sërë problemesh që kanë ridalë në sipërfaqe, kreu i shtetit helen ka qenë mjaft i prerë sot ndaj homologut turk.
Gjatë një vizite në bazën detare të Salaminës, Prokopis Pavlopulos iu përgjigj pretendimeve të Presidentit të Turqisë, Erdogan mbi Traktatin e Luzanës të fillimit të viteve ’20, i cili përcakton statusin e ishujve në Egje, shkruan Albeu.com.
“Ne jemi këtu për të jetuar bashkë në paqe dhe për të ndihmuar fqinjët tanë që të bëhen pjesë e BE-së. Ata që deklarojnë se Traktati i Luzanës nuk ekziston apo se duhet riparë, janë komplet injorantë në histori dhe ligjin ndërkombëtar”, tha Pavlopulos duke iu përgjigjur drejtpërdrejt Presidentit Erdogan, i cili tha para disa ditësh se Traktati i Luzanës duhej rishikuar.Traktati i Luzanës u nënshkrua në fillim të viteve ’20 mes fuqive europiane dhe Turqisë duke parashikuar statusin e ishujve të Egjeut si edhe Trakisë Perëndimore. Turqia pretendon se statusi i një pjese të ishujve të Egjeut është ende “gri” dhe duhej rishikuar mes dy vendeve duke bërë ndryshime në këtë traktat.
