Një ngjarje e rëndë ka ndodhur në Kampionatin Ballkanik të të rinjve U-17 në mundje i cili po zhvillohet në Slloveni.
Mundësi shqiptar Leonardo Frrokaj i cili është edhe kampioni i vendit dhe garon në peshën 63 kg, ka humbur ndjenjat gjatë garës, pasi ka dëmtuar dy vertebra të shtyllës kurrizore. Ky aksident ndodhi në përballjen me kundërshtarin moldav në stilin greko-romak e vlefshme për medalje të artë ose të argjendtë.
Menjëherë Federata Botërore e Mundjes dhe organizatorët i kanë ardhur në ndihmë sportistit shqiptar, të cilin e kanë transportuar me helikopter në Lubjanë, ku i është nënshtruar një operacioni për rreth 4 orë.Në mbështetje të mundësit shqiptar është gjendur edhe ambasadori i Shqipërisë në Slloveni, Pëllumb Qazimi, si dhe diplomatë të tjerë. Gjithsesi gjendja e 17-vjeçarit nuk është e mirë pasi ai qëndron në gjendje kome deri në një mënyrë tjetër, me të cilën mjekët po përpiqen që t’i rikthejnë frymëmarrjen natyrale dhe lëvizjen e gjymtyrëve.
