Prej tre muajsh pret në portën e onkologjikut për të ardhur ilaçi i quajtur avastin që shërben si medikamenti kryesor kundër kancerit të vezoreve. E quajnë Lena dhe është nga qyteti i Lushnjës. 61-vjeçarja tregon se është diagnostikuar me kancer të vezoreve para disa muajsh dhe i është nënshtruar disa operacioneve në shtetin italian për heqjen e tumorit, kosto që thotë se u mbuluan nga spitali.
Por me rikthimin në Shqipëri ku dhe do duhej t’i nënshtrohej kurës së kimios gruaja mëson se spitali ‘Nënë Tereza’ nuk e disponon ilaçin avastin dhe se i duhet të pres në shtëpi derisa nga shërbimi onkologjik t’i komunikohet furnizimi me këtë bar tepër të kushtueshëm.
Por nga QSUT nuk është kujtuar kush thotë ish-infermierja e dalë në pension ndaj dhe i është drejtuar me mesazh ministres së shëndetësisë dhe kryeministrit Rama, por më kot. Përballë sëmundjes që avancon në mungesë të kurës gruaja thotë se kërkoi borxh tek të afërm dhe për të mundësuar dy seanca kimio në Itali për muajt janar shkurt. Marsi sërish e gjen në hyrje të onkologjikut me shpresë se këtë herë medikamenti është siguruar edhe për te por kupton se për disa ka e për disa jo. E rrënuar nga borxhet e shëndetit ku shteti i saj ka kontribuar thuajse zero 61-vjeçarja pensioniste i drejtohet me një lutje publike numrit një të qeverisë me shpresë se këtë herë lutja e saj do të ketë më shumë efekt se mesazhet pa përgjigje.
Të kontaktuar nga ‘News24’, burime nga drejtoria e Spitalit pohojnë se në të njëjtën ditë që është realizuar interviste, të hënën shërbimi onkologjik është furnizuar me medikamentin avastina. Por pa specifikuar se prej sa kohësh vijon mungesa e medikamentit dhe a mjafton furnizim me këtë medikament për të gjithë të sëmurët që trajtohen me avastin.
