Kryeministri Edi Rama gjatë një takimi me policinë e Shtetit bëri një falenderim për patrullën që u përball me 4 grabitësit e armatosur pak ditë më parë në Fier.
Ishte kryeministri ai që zbuloi detajin e veçantë, se kjo ishte e njëjta patrullë që u përball me një grabitës që i mori jetën një qytetari.
“Po kjo patrullë rreth një muaj ndoqi me shpejtësi të lartë dhe arrestoi grabitësin e armatosur që i mori jetën një qytetari.”
E premte , 2 mars 2018: Rreth orës 10:55 të së premtes Agur Vrenozi dhe Gëzim Hoxha ndodheshin në punë si çdo ditë tjetër, kur 3 persona të armatosur iu afruan për të grabitur pikën e këmbimit valutor në pronësi të Hoxhës.
Ndonëse në një orë dhe një zonë me lëvizje të shumta, 3 grabitësit, Zini Fyraj, Lulëzim Demiraj dhe Dashamir Gergali, nuk nguruan të përdornin armën.
Në momentin që pa grabitësit brenda pikës së këmbimit të mikut të tij Hoxha, 54-vjeçari Vrenozi nuk qëndroi duarkryq, por ndërhyri.
Sipas dëshmitarëve në vendngjarje, por edhe pamjeve të kapura nga kamerat e sigurisë, me qëllim që të ndalonte grabitësit, Vrenozi fillimisht u mbylli atyre derën.
E në përpjekje për t’i ndaluar ata, ai kapi një karrige dhe i goditi grabitësit me të.
Por pikërisht ky veprim heroik i kushtoi babai të katër fëmijëve jetën. Grabitësit hapën zjarr duke e lënë të plagosur 54-vjeçarin në kokë.
Në gjendje të rëndë, ai u dërgua fillimisht në spitalin e Fierit, e pak më vonë u transportua drejt Tiranës. Pavarësisht të gjitha përpjekjeve të mjekëve, Vrenozi ndërroi jetë, një ditë më vonë.
Dëshmitarë në zonën “Zogu i Zi” të Fierit, ku ndodhi dhe ngjarja e rëndë duke folur për mediat rrëfyen se e teksa Vrenozi qëndronte i plagosur përtokë, askush nuk u afrua për ta ndihmuar.
E teksa largoheshin, grabitësit qëlluan edhe pronarin e Gëzim Hoxha, duke e lënë gjithashtu të plagosur.
Çfarë ndodhi tri ditë më parë (23 mars):
Xhuljano Sollaku, së bashku me 3 persona të tjerë të gjithë të maskuar e të armatosur, tentuan që të grabisnin banesën e Minella Muçi, në lagjen “29 Nëntori” të Fierit.
Por ata u përballën me efektivët e policisë, të cilët me t’u njoftuar nga 68-vjeçari Muçi shkuan në vendngjarje.
Autorët hapën zjarr dhe policia iu kundërpërgjigj.
Për pasojë mbeti i vrarë 20-vjeçari Sollaku dhe u plagos grabitësi tjetër, 33-vjeçari Arben Muça. Ky i fundit ndodhet në spital. Ndërsa dy grabitësit e tjerë mundën të largoheshin dhe puna për kapjen e tyre vijon.
AlpeNews.al
