Prokuroria ka sekuestruar sot të gjitha kontratat e shitblerjeve të pasurive në kohën kur Adriatik Llalla ka qenë Prokuror i Përgjithshëm. Për të prej ditësh Prokuroria e Përgjithshme me anë të një grupi special hetimi, ka verifikuar dhe investiguar duke marrë informacione nga hipotekat, ILDKPI dhe zyrat notariale dhe ato të vlerësimit të pasurive të patindshme.
Pasi është konstatuar se kishte elementë të mjaftueshëm, Prokuroria e Durrësit ka regjistruar procedimin penal ndaj ish-prokurorit të përgjithshëm Adriatik Llalla.
Mësohet se ish-kreu i organit të akuzës akuzohet për pastrim parash, ndërsa regjistrimi i procedimit u bë pasi Komisioni i Pavarur i Kualifikimit dërgoi një javë më parë zyrtarisht gjetjet për ish-prokurorin e përgjithshëm.
Dosja do të hetohet nga kryetarja e Prokurorisë së Durrësit Donika Prela, ndërkohë që organi i akuzës në qytetin bregdetar ka kërkuar informacione nga disa institucione. Burimet thanë se për ish-prokurorin e përgjithshëm, akuza e Durrësit ka kërkuar informacione nga Hipoteka, Tatimet si dhe ILDKPI e cila ende nuk ka dërguar pasurinë e Adriatik Llallës që nga koha që ai mori drejtimin e organit të akuzës.
Regjistrimi i procedimit penal në Durrës ka të bëjë me konfliktin e interesit, pasi në kohën që Llalla ka qenë Prokuror i Përgjithshëm drejtuesi i Krimeve të Rënda apo dhe i Tiranës ushtronin funksione në kryeqytet ndërsa njëri prej tyre është emëruar nga Llalla.
Pak kohë më parë sekretari amerikan i shtetit Rex Tillerson e shpalli ish-prokurorin e përgjithshëm “non grata”, pasi sipas autoriteteve të Shteteve të Bashkuara të Amerikës, ai dyshohej si i përfshirë në afera të mëdha korruptive.
