Banorë të fshatit Muzhak në Burrel japin një version tjetër nga ai paraprak i Policisë për aksidentin e djeshëm që mori jetën e dy djemve. Dy viktimat janë Gentian Hani, 29 vjeç dhe Alfred Balla, 35 vjeç, babai i dy fëmijëve të mitur. Ndërsa një 17-vjeçar me iniciale A.H. mbeti i plagosur rëndë dhe u transportua dje drejt Tiranës pas aksidentit për mjekim të specializuar.
Një 15-vjeçar me iniciale Xh.N. u arrestua si shoferi i makinës të përfshirë në aksidentin vdekjeprurës.
Dinamika
Banorë të zonës thanë se 15-vjeçari dyshohet se kishte vendosur një bast me një tjetër person dhe po zhvillonte një garë shpejtësie me makina. Në një moment, automjeti që drejtohej nga adoleshenti ka përplasur dy motoçikleta e më pas një bordurë.
Vendi ku u përplasën motoçikletat
“Ka fluturuar makina 4-5 metra në ajër”, tregon vazhdimësinë e aksidentit një banor, i cili shprehet se e ka parë skenën e incidentit.
Bordura ku u përplas makina pasi u aksidentua me motoçikletat
Më pas, ka aksidentuar dy personat që po qëndronin në këmbë pranë bordurës anë rrugës, vijon rrëfimi.
Një nga drejtuesit e dy motorave të përfshirë në aksident, edhe pse pësoi lëndime u largua nga vendngjarja, ndërsa tjetri, djali 17 vjeç u plagos rëndë. Ai u gjet nga policia në një kanal më shumë se 1 orë pas aksidentit, thotë banori.
Kanali ku u gjet 17-vjeçari
Ndërkohë, dy personat e tjerë që ishin në këmbë pranë bordurës anë rrugës mbetën të vdekur: Gentian Hani dhe Alfred Balla.
Në makinën të cilën e drejtonte 15-vjeçari ishin edhe tre persona të tjerë, sipas të njëjtave burime. “Makina ndaloi disa metra më pas dhe nga ajo zbritën katër persona”, tregon më pas banori.
Vendi ku ndaloi makina pas aksidentit
Orari
Një tjetër pikë që nuk përputhet në dy versionet e treguara nga të afërm të vikamave dhe policisë është edhe orari kur ndodhi aksidenti.
Sipas njoftimit paraprak të bluve të Dibrës, aksidenti ndodhi rreth orës 19, ndërsa banorë të fshatit Muzhak thonë se ndodhi rreth orës 18.
“Është njoftuar Policia në orën 6 e 10 dhe ka ardhur në 19:10 edhe pse me makinë është 5 minuta larg, ndërsa ambulanca ka ardhur në 19:20”, shprehet një prej tyre.
Njoftimi paraprak i Policisë lidhur me aksidentin
Sonte rreth orës 19.00, në vendin e quajtur ‘Lapidari’, njësia Administrative Komsi, Mat, janë përfshirë në aksident një automjet dhe një motoçikletë, ku janë aksidentuar 3 shtetas.
Menjëherë është ngritur grupi hetimor ku ka shkuar në vendin e ngjarjes dhe nga verifikimet paraprake ka rezultuar se një automjet është aksidentuar me një motoçikletë. Për pasojë janë aksidentuar shtetasit:
-Gentian Hani, rreth 29 vjeç, i cili ka humbur jetën në vend si pasojë e aksidentit.
– Alfred Balla, rreth 35 vjeç, banues në Komsi, i cili ka humbur jetën gjatë rrugës drejt spitalit të Tiranës
-A.H, rreth 17 vjeç, banues në Komsi, po transportohet drejt spitalit të Tiranës.
Drejtuesi i automjetit pasi ka shkaktuar aksidentin është larguar nga vendi i ngjarjes, dhe më pas janë paraqitur në Komisariatin e Policisë Mat, pronari i automjetit shtetasi G.N, 50 vjeç, dhe djali i tij shtetasi Xh.N, rreth 15 vjeç.
Paraprakisht dyshohet se automjetin e drejtonte shtetasi Xh.N, i cili është përplasur fillimisht me motoçikletën, dhe më pas me shtetasit këmbësor.
Grupi hetimor po vijon hetimet për zbardhjen e plotë të shkaqeve të aksidentit.
