Ditë historike për shqiptarët dhe Shqipërinë. Më në fund, ora e llogaridhënies për gjyqtarët dhe prokurorët shqiptarë ka trokitur. Sot, procesi i Vetingut, një prej elementëve më të rëndësishëm të Reformës në Drejtësi, hyn në fazën më vendimtare, atë të nisjes së pastrimit radikal të drejtësisë nga prokurorët dhe gjyqtarët e korruptuar.
Gjyqtari i parë që do të japë llogari para Komisionit të Vlerësimit është Fatos Lulo, i Gjykatës Kushtetuese. Seanca ka nisur në orën 11:00, ku gjyqtari Lulo nuk është i pranishë. Ai ka vendosur të përfaqësohet nga avokati i tij, Ardjan Visha. Ndërkohë, ky proces i rëndësishëm për drejtësinë shqiptare do të ndiqet dhe nga ekspertë të Shteteve të Bashkuara të Amerikës dhe Bashkimit Evropian.
E pranishme në seancën maratonë dëgjimore me gjyqtarët dhe prokurorët e parë, të cilët po i nënshtrohen Vetingut, është edhe përfaqësuesja e ONM, Elka Evnekomva. Ndërkohë, në seancë nuk janë lejuar kamerat, por vetëm gazetarët, të cilët nuk lejohet të bëjnë fotografi dhe video.
Anëtarja e komisionit, Etleda Çiftja, ka deklaruar se procedurat filluan me një hetim të thellë dhe gjithëpërfshirës. Ndër të tjera, ajo ka sqaruar se në lidhje me rivlerësimin e pasurisë, ILDKP ka dorëzuar raport, ku theksohet se Fatos Lulo ka mungesë të burimeve financiare të pasurisë dhe ka kryer deklarim të rremë.
Disa nga pasuritë e gjyqtarit Lulo: Një apartament te ‘Rruga e Durrësit’, e fituar me kontratë dhurimi. Zyra te ‘Ismail Qemali’, shuma prej 100 mijë dollarë e dhuruar. Depozitë në Kanada 480 mijë dollarë kanadez dhe shtëpi në Kanada. /shqiptarja.com
