Katër anëtarët e një familjeje në Britaninë e Madhe janë gjetur të vdekur në dy lokacione të ndryshme.
Trupat e babait dhe dy djemve u gjetën të vdekur në plazhin e Eastbourne para se mamaja të gjendej e vrarë me thikë rreth 130 km larg, në kryeqytetin britanik të Londrës.
Scotland Yard nisi hetimet për vrasje pasi një grua, e cila besohej se ishte në të 40-at, u gjet e vdekur në shtëpinë e saj në South Road, pasditen e së hënës. Detektivët u përpoqën të gjenin bashkëshortin e saj 57-vjeçar dhe dy djemtë, të moshave 7 dhe 10 vjeç, por ata ishin gjetur të vdekur një orë më parë në plazhin e Eastbourne, në Sussexin lindor.
Lajmi bëhet i ditur nga “the Independent”, e cila nuk bën të ditur identitetin e saktë të viktimave.
Një zëdhënës i policisë tha se “pritet të bëhen identifikimet zyrtare të viktimave, por policia beson se janë familjarë të gruas së vrarë.”
Deri më tani nuk ka të arrestuar lidhur me vdekjet e mistershme dhe zyrtarë të policisë thanë se për momentin nuk as ka persona të shpallur në kërkim lidhur me ngjarjet.
Një makinë është gjetur pranë bregdetit në Sussex, ndërsa shtëpia e gruas në Londër mbetet e bllokuar si skenë krimi. Të afërmit janë informuar për ngjarjen e rëndë, ndërsa autopsia e viktimave nuk është kryer ende./tvklan.al
