Gjatë diskutimeve në parlament një ditë më parë për projektligjin për Vettingun në Polici, ku nuk munguan akuzat, ishte vetë kryetari i opozitës që u përpoq të shfrytëzonte vizitën e Prokurorit Kombëtar Antimafia në Itali, për të hedhur baltë mbi policinë.
“Ndërkohë që sot që flitet me një skizofreni të plotë politike dhe individuale nga parafolësit e maxhorancës, kryeprokurori italian ka thënë tre fjalë të thjeshta: Mafia ka pushtuar policinë. Ia ka thënë ministrit të Brendshëm në zyrë dhe e ka thënë dhe ne konferencë për shtyp. Mafia shqiptare ka lidhje me politikën dhe ka pushtuar policinë”, tha Basha në seancë.
Kjo deklaratë e liderit të opozitës, që ka mbajtur më herët edhe detyrën e ministrit të Brendshëm u përgënjeshtrua brenda pak orësh nga vetë prokurori kombëtar italian Antimafia.
I befasuar nga lehtësia e deklaratave të shefit të opozitës, duke përdorur vizitën e tij në Tiranë për konsum të brendshëm politik, është detyruar të reagojë me një gjuhë të ashpër.
“Në kuadër të deklaratave që kam bërë për shtypin, në një prej njoftimeve lexova se thuhej se do të vija ekskluzivisht për të theksuar se sa i infiltruar është krimi i organizuar në politikën e brendshme shqiptare.
Është e qartë se së pari, po të kishte qenë kështu, nuk do të kisha ardhur”, u përgjigj kryeprokurori De Raho në një intervistë për Report TV.
Më tej, prokurori që theksoi se ka ardhur për këtë vizitë me ftesë të ministrit të Brendshëm Fatmir Xhafaj, shtoi se takimi ishte në kuadër të bashkëpunimit gjyqësore dhe policor mes dy vendeve.
“Marrëdhënia që kam patur si me ministrin e Brendshëm, ashtu si edhe me ministren e Drejtësisë, evidenton se çfarë përpjekje e madhe po bëhet kohët e fundit, për luftimin më efikas dhe efiçent të krimit të organizuar.
Kështu që dua të lëshoj një alarm.
Nëse shtypi e ngatërron lexuesin, është e qartë se i bën një shërbim të keq qytetarëve dhe i bën njëkohësisht nderin më të madh krimit të organizuar.
Sepse është e qartë se vëmendja bie te ky lajm, pra te politika e brendshme që është infiltruar dhe jo te lufta, te përkushtimi që po bëhet kund krimit të organizuar, që është një gjë efektive, aktuale, për të cilën pikërisht kam ardhur këtu në Shqipëri”, u shpreh De Raho.(TemA)
