Përkeqësimi i motit ka nisur të ndjehet në të gjithë vendin. Në Dibër janë bllokuar të gjitha akset rrugore si pasojë e rreshjeve të shumta debore. Të bllokuar janë fshatrat, Lurë, Ostren, Selishta, Trebishta, dhe Kalaja e Dodës.
Aksi Peshkopi-Tiranë kalohet nga mjetet me zinxhirë.
Shkodër
Edhe Shkodra është përfshirë nga reshjet e dendura të dëborës, ku këtë mëngjes ka nisur të bie edhe në qytet. Ndërkohë, zonat malore janë të bllokuara, si Thethi, Dukagjini e Iballa. Ndërsa, në Pukë nuk paraqiten probleme.
Lezhë
Reshjet e dëborës kanë zbardhur qytetin e Lezhës. Dëbora ka rënë gjatë orëve të natës, ndërsa nuk ka probleme në lëvizje. Temperaturat janë ulur ndjeshëm. Dëbora në qytetin e Lezhës është rikthyer pas 8 vitesh, pasi për herë të fundit ky qytet është zbardhur në vitin 2010.
Vlorë
Edhe në qytetin bregdetar të Vlorës situata vijon të paraqitet problematike prej ditës së djeshme. Dëbora e dendur ka mbuluar Llogaranë, duke krijuar vështirësi në qarkullimin e mjeteve. Deri më tani rruga është e kalueshme vetëm me përdorimin e zinxhirëve.
Përgatiti: AlpeNews.al
