Roberto Rosetti ka propozuar që hapi i tjetër i VAR do të jenë fotografitë në stadium, ku tifozët dhe lojtarët do të kishin të qartë vendimet e gjyqtarëve
VAR (Video Assistant Referee) pritet të bëjë një hap të madh përpara, që do të ishte shumë i mirëpritur nga lojtarët dhe tifozët në stadium.
Këtë sezon teknologjia po përdoret në shumë gara, ku rastet e dyshimta shikohen në video të përsëritura nga gjyqtarët, të cilët më pas marrin një vendim.
Por, këtë vendim nuk e shohin lojtarët dhe tifozët në stadium dhe shpesh janë të pakënaqur.
Kjo pritet të ndryshojë, pasi pritet që në stadium të shfaqen pamjet e vendimeve të gjyqtarëve, në mënyrë që të gjithë ta kenë të qartë se çfarë ndodhi, të mos ketë konfuzion.
“Hapi tjetër i VAR do të jetë paraqitja e pamjeve në stadiume, ku tifozët dhe lojtarët mund të shohin çfarë vendime dhe pse janë marrë”, tha shefi i këtij projekti, Roberto Rosetti.
Ai po ashtu e konfirmoi se VAR ka pasur shumë sukses që prej apelimit, pasi shumë vendime të gabuara janë përmirësuar dhe skuadrat nuk janë ndëshkuar për faj të gjyqtarëve.
