Policia greke në Janinë ka mundur të çojë prapa hekurave një grup të strukturuar që trafikonte emigrantë shqiptarë që kërkonin për të hyrë në Greqi.
Në total u prangosën 7 shqiptarë dhe 4 shtetas grekë. Kreu i grupit ishte një shqiptar i moshës 40 vjeçare. Në grup kishte edhe 4 “punonjëse” femra, përfshi këtu edhe një grua e cila ashtu si shqiptari, kishte rol drejtues në grup.
Rradha e punës së trafikantëve ishte e thjeshtë. Fillimisht bëhej kontakti me të interesuarit, dhe pas pagesës (që ishte përgjithësisht 500 euro personi), emigrantët merreshin pas kalimit të pikave të caktuar të kufirit të gjelbër me makina, e më pas dërgoheshin në destinacionet e kërkuara prej tyre.
Sipas hetimeve të deritanishme rezulton se grupi në fjalë të ketë trafikuar rreth 180 persona., ndërsa shuma e gjeneruar e parave arrin në shifrën e 100 mijë eurove. Me përfundimin e aksionit, policia ka sekuestruar një sasi të madhe parash, por edhe armë të ftohta, që “taksistët” i mbanin për raste të ndonjë konflikti të mundshëm. Janë sekuestruar gjithashtu edhe armë zjarri. Për të komunikuar me “shefat” mbaheshin edhe radio marrëse.
