Jose Mourinho pretendon se zotët e futbollit ishin me Newcastle United teksa trajneri i Manchester United i ka thurur elozhe kundërshtarëve për shpirtin luftarak në St. James Park.
Goli i parë i sezonit të Matt Ritchie i dha fitoren ekipit të tij ndaj United. Mesfushori skocez zhbllokoi rezultatin për skuadrën e tij në minutën e 65-të.
“Ata luftuan si kafshë – shpresoj ta marrin si kompliment,” shprehet Mou për Sky Sport pas ndeshjes.
“Zotët e futbollit ishin në krahun e tyre. Nuk ishte e thënë që ne të shënonim gol sot. Newcastle dha gjithçka dhe kjo është e bukura e futbollit.
“Ata luftuan për një pikë, një pikë ishte misioni që i kishin vendosur vetes.
“Ne bëmë një gabim në mbrojtje dhe kur ata ishin përpara kishin vetëm një gjë në mendje dhe dhanë gjithçka për të mbajtur rrjetën të paprekur.”
