Replika dhe kundër replika ka pasur ditën e sotme mes pedagogëve të Universitetit të Tiranës dhe ministres së Arsimit, Lindita Nikollës, pas lajmit se ata nuk kanë marrë akoma rrogën e Janarit.
Në një reagim për mediat, Ministria e Arsimit, duke kërkuar ndjesë për këtë situatë, është shprehur se mos pagesa e tyre ka ardhur si pasojë e mungesës së një akti nënligjor.
Por, lidhur me këtë zhvillim ka reaguar edhe Rektori i Universitetit të Tiranës, Mynyr Koni, i cili ka sqaruar se pagat mund të ishin dhënë nëse Bordi i Administrimit do të kishte çelur fondin për pagat nga të ardhurat e institucionit.
Reagimi Konit:
“Të nderuar kolegë dhe punonjës të Universitetit të Tiranës!
Jam shumë i shqetësuar në lidhje me mospagesën për punën tuaj të kryer për muajin Janar 2018. Ky është një veprim i paprecedentë nga autoritetet përgjegjëse të ngarkuar me ligj, Bordi i Administrimit dhe Administratori i Universitetit.
Në pritje të daljes të një akti nënligjor, kjo ka bërë të mundur që të bllokohet transferta e pakushtëzuar për Institucionet e Arsimit të Lartë publik.
Në këto kushte, Bordi i Administrimt duhet të kishte çelur fondin për pagat nga të ardhurat e institucionit. Kështu që në Universitetin e Tiranës, të ardhurat e trashëguara nga viti 2017 janë të mjaftueshme për çeljen e fondeve të pagave për personelin e Universitetit të Tiranës. Bordi i Administrimit të UT si dhe Administratori i UT nuk kanë vepruar në çeljen e fondit të pagave nga të ardhurat, të paktën për muajin Janar. Kjo ka bërë të mundur që punonjësit e UT të mos kenë marrë pagat.
Ky veprim i BA dhe Administratorit vjen si pasojë e paaftësisë apo mosveprimi i tyre ka të bëjë me trysninë ndaj stafit akademik dhe joakademikt të UT, ashtu siç po veprohet prej një periudhe afro 8-mujore ku një pjesë e stafit të Rektoratit të UT nuk kanë marrë pagat.
Në emër të gjithë punonjësve të UT, i bëj thirrje Bordit të Administrimit dhe Administratorit të çelin fondin e pagave të muajit Janar nga të ardhurat dhe të bëhet pagesa e punonjësve brenda ditës së hënë, datë 12.02.2018”, thuhet në reagimin e Konit.
