Valdete Xhaferi nga Vlora, tregon për emisionin “Stop”, se ka fituar një gjyq në Apel për çështje pronësie, por nuk e hipotekon dot, pasi Hipoteka i kërkon urdhër ekzekutimi.
Por kancelarja e Gjykatës pretendon se ia ka dhënë dorazi Memli Xhaferi, pasi e njeh personalisht, ngaqë punon polic.
Në këto kushte bëhet debat, por kancelarja nuk jep zgjidhje, duke i mbajtur kështu të bllokuar pronën familjes Xhaferi.
“Jam Valdete Xhaferi, nusja e djalit e Memli Xhaferit, i jemi drejtuar emisionit “Stop”, pasi ne kemi një problem që na ka ngecur në Gjykatë. Kemi pasur një gjyq në Shkallën e Parë për çështje pronësie, Zoti Memli e ka pasur me vëllain e tij. U zhvillua gjyqi nuk e fituam. Shkoi çështja në Apel e fituam. E marrim vendimin dhe shkuam për të regjistruar vendimin, e depozituam vendim e gjykatës dhe më pas më kthehet një përgjigje, ku na kërkojnë të dhënat e pronës. Më pas më kthejnë një përgjigje tjetër, ku më kërkojnë urdhrin e ekzekutimit, për të regjistruar pronën. Shkojmë tek kancelarja duke menduar se ajo do të na i dorëzojë urdhrin, siç dhe i takon. Kurse ajo na thotë ju e keni marrë urdhrin. Nëse nuk e kemi tërhequr ne dhe me vetëdije, ose pa vetëdijen e saj, e ka marrë pala humbëse”.
Pala fituese ankohet se nuk merr dot urdhrin ekzekutues në gjykatë. E kanë fituar çështjen por nuk e regjistrojnë dot në Hipotekë.
Gazetarja e emisionit “Stop” së bashku me familjen Xhaferi i është drejtuar kancelares së Gjykatës së Apelit Vlorë për t’i kërkuar urdhrin e ekzekutimin nr. 904 të datës 11.07.2017.
Frida Gani, kancelare e Gjykatës së Apelit Vlorë: Urdhri i ekzekutimi është marrë nga vetë djali i paditësit, i gjyqfituesit. Ligji e ka që urdhri i ekzekutimit përpilohet në tre kopje, një kopje e ka marrë pala, një në arshive dhe një tjetër e ka pala që është i biri.
Gazetarja: Mund ta shikoj pak?
Frida Gani: Ai pretendon se nuk e ka marrë.
Por djali, thotë se nuk e ka marrë.”Kjo nuk është e vërtetë, se zonja më ka thënë se ditën që kam rënë në kontakt, ne i kemi marrë të gjitha, ndërkohë që ne nuk kemi marrë asnjë gjë”.
Frida Gani: Unë ta kam sqaruar ligjin.
Gazetarja: A ka një rregullator në këtë mes … se ti tha ja kam thënë, djali thotë se kam marrë?
Frida Gani: Unë e kam të arkivuar që nga gjykata është lëshuar.
Frida Gani: Është dhënë ashtu se ju jeni polic, dhe ju është thënë në mirëbesim. Jeni i njohur prej meje.
Gazetarja: Ai duhet të kishte firmosur diku, se ligji është i barabartë për të gjithë, ç’rëndësi ka se është gjykatës, prokuror…Kush do ta zgjidhë këtë?
Frida Gani: Të bëjë rekurs kundër vendimin që e ka rrëzuar gjykata, të vazhdojë procedurat ligjore.
Pas kësaj përgjigje të kancelares Frida Gani, familjes Xhaferi, nuk i mbetet gjë tjetër vetëm të vazhdojë me procedurat ligjore.
