Deputeti demokrat, Enkelejd Alibeaj, ishte i ashpër në fjalën e tij me ministren e Drejtësisë, Etilda Gjonaj për çështjen e ekstradimit në Itali të Nezar Seitajt, i dyshuar si financier i bandës së Habilajve.
“Ministrja e Drejtësisë duhet të bënte verifikime para se të vendoste ekstradimin e Nezar Seitajt. Ekstradoi Nezar Seitin me ngut, duke mos respektuar ligjin. Financieri i bandës së Habilajve ishte e vetmja gojë që do të fliste. Në historinë mes hajdutëve dhe kriminelëve ju ku e fusni veten?! Pranoni përgjegjësinë. Në burgun 313 ka një qeli e lënë bosh, e vetme ajo qeli nuk ju mban të gjithëve,” tha Alibeaj.
Pas fjalës së ministres, ai tha se “Gjonaj foli si një e pandehur që kërkonte mëshirë”.
“Nuk thuhet Katanja, thuhet Katania. E ka çuar në Katania, jo për pushime, po për burg. Katania po heton Nezar Seitin dhe Moisi Habilajn, por jo Saimir Tahirin. Prokuroria e Krimeve të Rënda e Shqipërisë heton Saimir Tahirin mbi të gjitha,” tha Alibeaj, duke shtuar se “Nezar Seiti do të fliste për Tahirin”.
Ai më pas tregoi një shkresë të firmosur nga vetë ministrja, ku tregohet se ajo ka pasur dijeni për situatën ligjore.
“Prokuroria e Krimeve të Rënda i kërkon ministrisë së Drejtësisë ndihmë ligjore për çështjen ku është përfshirë Saimir Tahiri dhe Nezar Seitaj. Kush e ka firmosur? Ministrja Etilda Gjonaj. E ke firmosur pa lexuar? Mëshirë për ty nuk do ketë”.
“Rrugë të mbarë të qoftë për tek 313-a, sepse e ke ditur, e ke firmosur”, tha Alibeaj.
“Sot do të depozitoj kallëzim penal për shpërdorim detyre,” tha Alibeaj.
Fjala e deputetit Enkelejd Alibeaj në Parlament.
Posted by Partia Demokratike e Shqipërisë on Thursday, February 8, 2018
