Spartak Ngjela thotë se gjatë viteve të fundit, korrupsioni kryesisht ka qenë përqendruar tek Drejtoria e Rrugëve.
Sipas tij, abuzimet me rrugët shkojnë deri në 500 milionë euro.
“Nuk mund të themi për reformën në drejtësi sepse reforma në drejtësi në konceptin e Kushtetutës ende nuk ka marrë formë të plotë juridike.
Por mund të themi se prokurorja që ka ardhur, me gjithë prokurorët që ka vendosur, po ecën në rrugë të drejtë në goditjen e kriminalitetit që vjen nga korrupsioni.
Do të kemi parasysh një gjë të saktë, që e dinë të gjithë, korrupsioni kryesor qeveritar i 10-12 viteve të fundit ka qenë tek Drejtoria e Rrugëve.
Të gjitha rrugët kanë mbetur në mes, duke përfshirë edhe Rrugën e Kombit, të gjitha kanë probleme në funksion të strukturave të tyre, por shpenzimi ka qenë shumë i shtrenjtë për kilometër të rrugës.
Korrupsioni në funksion të rrugëve në Shqipëri që mund të jetë ndoshta më shumë se 500 milionë euro është me vullnetin e kryeministrave”, u shpreh Ngjela për “Sot”.
Në vijim të reagimit të tij, Ngjela e ndali theksin edhe tek pritshmëritë e hetimeve.
Ai nënvizoi se nga hetimet janë të rrezikuar edhe njerëz me pozicione të larta, midis të cilëve përmendi edhe kreun e PD, Lulzim Basha, i cili ka lidhje me “Rrugën e Kombit”.
“A do të shkojë hetimi deri lart? Kjo varet nga ekspertiza.
Po ministri tjetër i qeverisë tjetër që ka brenda prapë një drejtor?
Po ministri tjetër i Transportit që për Rrugën e Kombit ka qenë Lulzim Basha, do ecet drejt këtij?
Do shikojmë. Mendimi im është që do ecet. Prandaj janë të shqetësuar”, tha Spartak Ngjela.(TemA)
