Nënkomisioni parlamentar “ad hoc” do të mblidhet sërish sot për herën e fundit, mbi përzgjedhjen me short për hartimin e listës së anëtarëve të Këshillit të Lartë Gjyqësor e Këshillit të Lartë të Prokurorisë.
Pas dështimit të dy raundeve, për shkak të mosaprovimit nga ana e opozitës, komisioni është i detyruar të mblidhet sërish dhe kësaj here, ashtu siç parashikon ligji, edhe nëse nuk ka sërish konsensus, lista e miratuar nesër konsiderohet e vlefshme.
Opozita prej kohësh akuzon maxhorancën se ka sjellë emra politikë, përfshi këtu edhe persona me precedentë penalë apo ish punonjës të sigurimit të shtetit.
Pavarësisht akuzave dhe krizës e cila nuk lejon zhbllokimin e dy organeve të rëndësishme si KLGJ e KLP, lista e tretë do të mbetet ajo që do të kalojë për votim në parlament, ashtu siç parashikon dhe elementi zhbllokues, i futur në ligjin për “Organet e qeverisjes së sistemit të drejtësisë”.
