Koreja e Veriut ka fituar 200 milionë dollarë gjatë vitit 2017 nëpërmjet eksportimit të mallrave të ndaluara, duke shkelur kështu sanksionet e vendosura nga OKB-ja. Sipas një raporti konfidencial të një grupi monitorues në SHBA, të cilit i referohet agjencia e lajmeve Reuters, përveç eksportit të mallrave të ndaluara, Peniani ka furnizuar me armë Sirinë dhe Mianmarin.
Sipas raportit të një komisioni mbi sanksionet në Këshillin e Sigurimit të OKB-së, Koreja e Veriut ka dërguar qymyr në portet e vendeve si Rusia, Kina, Koreja e Jugut, Malajzia dhe Vietnami kryesisht duke përdorur dokumente të rreme që tregonin si vende të origjinës Rusinë apo Kinën.
Këshilli 15-anëtarësh, në mënyrë unanime i ka vendosur sanksione Koresë së Veriut që nga viti 2006, në përpjekje për t’i reduktuar fondet për programet e raketave bërthamore dhe balistike. Sanksionet përfshijnë ndalimin e eksproteve për mallra si qymyri, hekuri, plumbi, tekstilet dhe prodhimet e detit. Po ashtu, sanksionet ndaj vendit komunist përfshijnë edhe kufizimin e importeve të naftës bruto dhe nënprodukeve të saj.
Pas zbulimit të këtij fakti, Koreja e Veriut nuk ka ende një koment, ndërsa Rusia dhe Kina janë shprehur gjithmonë se nuk i kanë shkelur sanksionet e vendosura nga OKB-ja.
Siria dhe Mianmari
Monitoruesit kanë hetuar për një bashkëpunim mes Sirisë dhe Mianmarit në fushën e raketave balistike, përfshirë këtu edhe 40 dërgesa të paraportuara të Koresë së Veriut në periudhën 2012-2017 në Qendrën për Kërkime dhe studime Shkencore në Siri, e cila ka nën kontroll programin e armëve kimike.
Në raport thuhet se hetimi ka zbuluar “dëshmi të shkeljes së embargos së armëve dhe shkelje të tjera, përfshirë transferimin e mjeteve që vihen në funksion të programeve për raketat balistike dhe armët kimike”.
Siria ka pranuar shkatërrimin e armëve kimike në vitin 2013. Megjithatë, ka dyshime të forta se atje ka ende armë kimike të fshehura që nuk janë dorëzuar ose janë përgatitur të tjera. Misioni sirian në OKB nuk ka dhënë ende përgjigje në lidhje me gjetjet e raportit.
Sërish sipas këtij të fundit, ka prova se Mianmari ka marrë raketa balistike nga Koreja e Veriut, por edhe armë të tjera si raketa tokë-ajër.
Por, ambasadori i Mianmarit në OKB, Hau Suan, e hedh poshtë këtë fakt, duke thënë se vendi i tij u është përmbajtur rezolutave të Këshillit të Sigurimit të OKB-së.
Sanksionet e OKB-së mbi eksportet dhe importet
Sipas rezolutës së vitit 2016, Këshilli i Sigurimit i OKB-së i ndaloi eksportet e qymyrit dhe u kërkoi vendeve të raportojnë çdo import të qymyrit nga Koreja e Veriut në Komitetin e Sanksioneve të Këshillit. Më pas, më 5 gusht, Këshilli i ndaloi të gjitha eksportet e qymyrit nga Koreja e Veriut.
Vëzhguesit e OKB-së kanë hetuar 16 dërgesa qymyrit në periudhën janar-gusht në portet e Rusisë, Kinës, Malajzisë dhe Vietnamit. Ata thanë se një prej këtyre dërgesave është raportuar nga Malajzia, ndërsa 15 të tjera janë në shkeje të plotë të sanksioneve. Njëzet e tre ngarkesa të tjera janë verifikuar në portet e Rusisë, Kinës, Koresë së Jugut dhe Vietnamit.
Në raport thuhet gjithashtu se kompani shumëkombëshe po hetohen për rolin e tyre në zinxhirin e furnizimit e Koresë së Veriut me produkte të naftës.
