Vladimir Putin ka vizituar një fermë bujqësore ku tha se nëse do të humbasë zgjedhjet e ardhshme, mund të zgjedh një karrierë të re si fermer.
Presidenti rus i bëri komentet derisa drejtoi një kombajnë në Rostov.
“Do të nis të punoj si kombajner pas 18 marsit”, citon Putinin, Russia Today.
Por Putin nuk duhet të brengoset. Vitin e kaluar, ai u bë lideri me qëndrimin më të gjatë në Kremlin që nga Joseph Stalin.
Kandidimin për një mandat të ardhshëm e bëri publik qysh në muajin dhjetor ndërkohë që sondazhet tregojnë se ai nuk ka një opozitë të fuqishme.
Të dhënat e fundit nga VTsIOM thonë që 69.9 për qind të rusëve do të votojnë për Putinin në zgjedhjet e muajit mars.
Po sipas të dhënave të njëjta, kundërkandidati i tij Pavel Grudinin nga Partia Komuniste ka një përkrahje prej 16 për qind.
Kritiku më i njohur i Putinit, Alexei Navalny, i është ndaluar gara për shkak të një borxhi të pa paguar ndaj shtetit. Ndërkohë i njëjti është arrestuar ditë më parë për pjesëmarrje në protesta.
