Ka nisur raundi i 21-të i Euroleague në basketboll për meshkuj, ku janë luajtur 5 takimet e para. Në Moskë, skuadra vendase e CSKA-së fitoi 93-87 ndaj Real Madrid, në sfidën krysore të këtij raundi, ndeshje me rivalitet dhe emocione. Përballë njëra-tjetrës ishin dy ekipe pretendente për titull, por moskovitët u shkëputën që në fillim dhe administruan avantazhin deri në fund, falë 18 pikëve të Rodriguez dhe 16 të Higgins, duke i bërë të pavlefshme 21 pikët e Doncic për spanjollët. Vazhdon të zhgënjejë skuadra e Barcelonës, që u mund 83-81 nga Armani Milano në fushën e saj (Goudelock, 20 pikë për italianët) . Një humbje që ndërlikon edhe më shumë pozitat e ekipit spanjoll për një vend në play off, pasi ekipi “blaugrana” tashmë renditet në vendin e 13-të, shumë larg 8 skuadrave më të mira.
Një tjetër përballje e fortë ishte ajo mes Olympiacos dhe Fenerbahce, me grekët që fituan me lehtësi 95-70 ndaj kampionëve turq. Ndonëse pritej një sfidë e fortë, në fushë dominoi skuadra helene, që korri fitoren e 14-të sezonale, duke qenë forca e dytë në Euroleague. Për grekët u dallua Strelnieks me 19 pikë, ndërsa 24 pikët e Muhammed për turqit mbetën për statistikë. Anadolu Efes mposhti 82-66 Valencia, dy skuadra që synojnë një vend në play off, ndeshje e dominuar nga turqit, që arritën suksesin e shtatë sezonal. McCollum me 24 pikë ishte lider në fushë për turqit. Fiton edhe skuadra lituaneze e Zalgiris Kaunas, që mposhti 99-84 Maccabi, sfidë emocionuese dhe me shumë pikë të realizuara nga të dyja ekipet. Jankunas me 17 pikë u dallua për vendasit në këtë sfidë.
EUROLEAGUE – RAUNDI I 21-TW
1 shkurt, Anadolu Efes – Valencia, 82-66
1 shkurt, CSKA Moskw – Real Madrid, 93-87
1 shkurt, Barcelona – Armani Milano, 81-83
1 shkurt, Zalgiris Kaunas – Maccabi Tel Aviv, 99-84
1 shkurt, Olympiacos – Fenerbahce, 95-70
2 shkurt, Khimki Moskw – Unicaja Malaga, ora 18:00
2 shkurt, Brose Bamberg – Panathinaikos, ora 20:00
2 shkurt, Baskonia Gazteisz – Crvena Zvezda, ora 20:30