YouTube mbetet rrjeti social më i përdorur në Shtetet e Bashkuara, i ndjekur nga Facebook dhe Instagram. Këto janë gjetjet e raportit vjetor të Qendrës Kërkimore Pew, i cili analizon përdorimin e platformave sociale nga amerikanët dhe dallimet mes grupeve të ndryshme të popullsisë.
Sipas raportit për vitin 2026, tri platformat kryesore ruajnë pozicionet e tyre edhe për shkak të përdorimit të gjerë nga grupmoshat më të mëdha. YouTube, Facebook dhe Instagram janë njëkohësisht rrjetet sociale më të përdorura nga amerikanët e moshës 65 vjeç e lart.
Megjithatë, përtej renditjes së përgjithshme, të dhënat tregojnë dallime të rëndësishme në përdorimin e platformave, në varësi të moshës, gjinisë, të ardhurave familjare dhe orientimit politik.
Rritet përdorimi i Snapchat dhe WhatsApp
Aplikacionet e përqendruara te komunikimi po zgjerojnë gjithashtu praninë e tyre në shoqërinë amerikane. Përdorimi i Snapchat dhe WhatsApp është rritur me nga 1 pikë përqindjeje krahasuar me një vit më parë.
Snapchat vazhdon të jetë më i përhapur te gratë amerikane. Sipas të dhënave, këtë platformë e përdorin 30% e grave, kundrejt 21% të burrave.
Ndërkohë, WhatsApp përdoret tashmë nga një përqindje më e lartë e burrave amerikanë sesa e grave, duke shënuar një ndryshim krahasuar me vitin e kaluar.
Dallimet sipas të ardhurave familjare
Raporti evidenton gjithashtu ndryshime në përdorimin e rrjeteve sociale në varësi të nivelit ekonomik të familjeve amerikane.
Snapchat është më i përhapur në familjet me të ardhura vjetore nën 70 mijë dollarë.
Në krahun tjetër, WhatsApp regjistron nivelin më të lartë të përdorimit, prej 40%, te amerikanët që jetojnë në familje me të ardhura vjetore prej të paktën 100 mijë dollarësh.
Në përgjithësi, platformat sociale shfaqin dallime të dukshme mes grupeve ekonomike. Facebook dhe TikTok priren të jenë më të përhapura në familjet me të ardhura më të ulëta, ndërsa LinkedIn tërheq më shumë përdorues nga familjet me të ardhura më të larta.
Nextdoor, diferencë e madhe mes familjeve me të ardhura të ulëta dhe të larta
Një tjetër platformë që evidenton dallimet ekonomike është Nextdoor, e përfshirë relativisht vonë në raportet vjetore të Pew Research Center.
Përdorimi i këtij aplikacioni është rritur me 5 pikë përqindjeje gjatë pesë viteve të fundit.
Megjithatë, vetëm 9% e amerikanëve që jetojnë në familje me të ardhura vjetore prej 30 mijë dollarësh ose më pak përdorin Nextdoor. Në familjet me të ardhura vjetore mbi 100 mijë dollarë, kjo përqindje arrin në 23%.
Të dhënat e raportit tregojnë se përdorimi i rrjeteve sociale në SHBA nuk përcaktohet vetëm nga mosha dhe gjinia, por ndikohet edhe nga niveli ekonomik i përdoruesve, duke evidentuar dallime të konsiderueshme në preferencat për platformat e ndryshme.
