Erjon Vishkulli, 28-vjeçari nga Elbasani që mbeti i plagosur rëndë gjatë protestës së 24 tetorit në kryeqytet, ka reaguar sërish nga spitali në Itali, ku iu nënshtrua një ndërhyrjeje delikate kirurgjikale në syrin e majtë.
Përmes një postimi në rrjetet sociale, i riu ka publikuar pamje nga ambientet e spitalit, duke përcjellë një mesazh shprese pas operacionit që bëri të mundur shpëtimin e syrit.
“Kur Zoti vendos të bëjë mrekulli, asgjë nuk është e pamundur”, shkruan Vishkulli, duke shprehur optimizmin e tij pas ditëve të vështira që ka kaluar.
Ndërhyrja kirurgjikale raportohet se ka përfunduar me sukses, megjithatë mbetet ende e paqartë nëse 28-vjeçari do të mund ta rikuperojë plotësisht shikimin. Gjendja e tij do të vijojë të monitorohet nga mjekët specialistë, të cilët do të vlerësojnë ecurinë e rikuperimit.
Ngjarja e rëndë ndodhi më 24 tetor, gjatë protestës së zhvilluar në Tiranë, ku Vishkulli u godit në syrin e majtë nga një objekt që dyshohet të ketë qenë plumb gome, në momentin e përplasjeve mes protestuesve dhe forcave të policisë.
Menjëherë pas incidentit, i riu u dërgua në Spitalin e Traumës, ku mori ndihmën e parë mjekësore. Për shkak të dëmtimeve serioze dhe nevojës për një ndërhyrje të specializuar, u vendos transferimi i tij drejt Italisë.
Më 25 tetor, Vishkulli njoftoi se kishte mbërritur në Romë, ku do të merrte trajtimin e nevojshëm, me shpresën për të shpëtuar syrin dhe për të ruajtur shikimin.
Tashmë, pas përfundimit të operacionit, mesazhi i tij nga spitali përcjell shpresë, ndërsa mbetet për t’u parë se si do të evoluojë gjendja shëndetësore gjatë javëve në vijim.
