Aktiviteti i malit Etna ka shkaktuar probleme serioze në transportin ajror në Siçili, duke detyruar autoritetet të pezullojnë fluturimet në aeroportin e Katanias.
Hiri vullkanik i përhapur në atmosferë ka krijuar kushte të pasigurta për avionët, ndërsa situata është komplikuar edhe më tej nga moti i pafavorshëm.
Sipas mediave të huaja, aeroporti ka ndërprerë të gjitha mbërritjet deri të dielën në orën 13:00. Udhëtarët janë këshilluar të kontrollojnë vazhdimisht statusin e fluturimeve dhe të komunikojnë me kompanitë ajrore përpara se të paraqiten në aeroport, pasi mund të ketë anulime ose ndryshime të orareve.
Problemet lidhen me aktivitetin e vazhdueshëm të Etnës, vullkanit aktiv që ngrihet pranë Katanias dhe që në mënyrë periodike ndikon në funksionimin e aeroportit.
Prania e hirit vullkanik në hapësirën ajrore konsiderohet veçanërisht problematike për aviacionin, ndaj autoritetet kufizojnë ose pezullojnë fluturimet sa herë që kushtet nuk garantojnë operimin e sigurt.
Edhe gjatë muajve të verës, aktiviteti i Etnës ka shkaktuar situata të ngjashme, duke sjellë ndërprerje dhe kufizime të trafikut ajror në këtë pjesë të Siçilisë.
