Një vajzë rreth 10 vjeçe ka mbetur e plagosur pas një sulmi me armë zjarri ndaj një kafeneje në lagjen Agios Panteleimonas të Athinës. Ngjarja është regjistruar pak para mesnatës së të premtes, ndërsa policia greke ka nisur kërkimet për identifikimin e autorëve.
Sipas të dhënave të deritanishme, rreth orës 23:50 një automjet me katër persona është afruar pranë lokalit, që ndodhet në rrugën Agorakritou 32. Nga makina është qëlluar disa herë në drejtim të kafenesë, përpara se autorët të largoheshin nga zona.
Në momentin e sulmit brenda lokalit ndodheshin rreth 10 persona, të cilët raportohet se janë shtetas shqiptarë.
Nga të shtënat ka mbetur e dëmtuar një vajzë rreth 10 vjeçe, e cila ka marrë plagë në pjesën e këmbëve. Hetuesit po përpiqen të përcaktojnë nëse e mitura është prekur nga ndonjë predhë apo është lënduar nga copëzat e objekteve të goditura gjatë breshërisë.
Menjëherë pas incidentit, nëna e saj nuk ka pritur mbërritjen e ambulancës. Ajo e ka marrë vajzën dhe e ka transportuar vetë drejt Spitalit të Fëmijëve “Aglaia Kyriakou”, ku e mitura ka marrë ndihmën e nevojshme mjekësore.
Hetimet morën një tjetër drejtim pak kohë më vonë, kur policia lokalizoi një automjet të djegur në një zonë jo shumë larg vendit ku ndodhën të shtënat. Dyshimet e para janë se makina mund të jetë përdorur nga personat që kryen sulmin dhe më pas është djegur për të zhdukur gjurmët.
Forcat e policisë kanë kryer kontrolle në zonë dhe po mbledhin prova që mund të ndihmojnë në rindërtimin e lëvizjeve të autorëve. Hetuesit po punojnë gjithashtu për të përcaktuar motivin e sulmit dhe nëse objektiv ishte lokali apo ndonjë prej personave që ndodheshin brenda tij.
Kërkimet për katër personat e dyshuar vijojnë, ndërsa autoritetet greke po punojnë për zbardhjen e plotë të dinamikës së ngjarjes.
