Ambasada e SHBA-së në Tiranë ka vënë theksin te forcimi i bashkëpunimit shqiptaro-amerikan në fushën e sigurisë dhe zbatimit të ligjit, përmes trajnimeve të përbashkëta mes profesionistëve të zbatimit të ligjit.
Në aktivitetin e 42-të të trajnimit të vazhdueshëm morën pjesë 235 profesionistë nga SHBA, Shqipëria dhe vende të ndryshme të Europës, me fokus luftën kundër krimit të organizuar ndërkufitar dhe rritjen e sigurisë.
Postimi i ambasadës amerikane
Kur Shtetet e Bashkuara dhe Shqipëria qëndrojnë së bashku, komunitetet tona janë më të sigurta. Nga 19 deri më 23 shtator, Sesioni i 42-të i Trajnimit të Vazhdueshëm i Kapitullit Europian të FBINAA-së mblodhi së bashku 235 profesionistë të zbatimit të ligjit nga Shtetet e Bashkuara, Shqipëria dhe e gjithë Europa. FBINAA bashkon drejtues të lartë të strukturave ligjzbatuese të trajnuar në Akademinë Kombëtare të FBI-së për të ndarë ekspertizë, për të forcuar bashkëpunimin dhe për të luftuar krimin e organizuar përtej kufijve. Qëllimi ynë është i qartë: zbatim më i fortë i ligjit, siguri më e madhe dhe komunitete më të sigurta në Shtetet e Bashkuara dhe në Shqipëri.
