Zakonisht, presidentët e Shteteve të Bashkuara, kur afrohen zgjedhjet afatmesme, kujdesen të theksojnë se emri i tyre nuk është në fletën e votimit për rinovimin e Dhomës së Përfaqësuesve dhe Senatit, në mënyrë që, në rast të një humbjeje, të mund t’ua atribuojnë përgjegjësinë kandidatëve të tjerë të partisë.
Donald Trump për njëfarë kohe e “përkëdheli” këtë ide, por më pas tundimi për të sfiduar traditën ishte më i fortë. Kështu, jo vetëm që u ka kërkuar amerikanëve të bëjnë sikur edhe ai vetë është në garë, me bindjen se është një magnet për votat, por ka vendosur edhe ta stampojë emrin e tij në të gjithë procesin elektoral, duke ideuar një Konventë të pazakontë që nis sot në Dallas.
“Trumpapalooza” e kanë quajtur kritikët e tij, edhe brenda vetë Partisë Republikane, pra një festival i personalitetit të tij, për të mos thënë i kultit ndaj tij, i cili sipas Trump duhet të afrojë sërish me GOP-in votuesit e lodhur nga lufta, inflacioni dhe kaosi.
Është një zgjedhje e guximshme, përveçse e pazakontë, sepse pasi ka vendosur kaq shumë fytyrën e tij në këtë garë, do të jetë shumë e vështirë të tërhiqet më pas dhe t’ua kalojë të tjerëve përgjegjësinë për një dështim të frikshëm.
Ai, megjithatë, është i bindur se sondazhet, të cilat e nxjerrin popullaritetin e tij pak mbi 30 për qind, gënjejnë. Sipas tij, sapo t’u kujtojë amerikanëve rezultatet e dy viteve të para të mandatit, referendumi mbi veten e tij do të shndërrohet në një triumf, në vend që të kthehet në një kurth.
Nuk duket se beson shumë në këtë skenar as zonja e parë, Melania Trump, e cila nuk do të jetë sonte në Dallas, kur bashkëshorti i saj do të mbajë fjalimin kryesor të Konventës.
Ndoshta është thjesht e bezdisur nga roli gjithnjë e më i madh i luajtur nga asistente Natalie Harp, por disa e shohin mungesën e saj si një shenjë mosbesimi, madje shumë pranë një “tradhtie” politike, e aftë të krijojë një boshllëk në skenë që mund të ketë peshë.
Nuk do të jetë aty as kandidatja për Senatin në Maine, Susan Collins, dhe kjo është një shenjë e pagabueshme politike. Në teori, ajo ka refuzuar pjesëmarrjen sepse kishte angazhime të tjera në fushatën elektorale, por në praktikë sepse druhet se të shfaqet në një skenë në Teksas së bashku me Trumpin nuk do ta ndihmojë aspak në zonat e pyllëzuara të New England-it, ku votuesit janë të irrituar nga rritja e çmimit të benzinës, madje më shumë sesa nga vetë lufta në Iran.
Konventa nis sot pasdite dhe që sonte presidenti do të mbajë fjalimin e tij, sepse mendon se në këtë mënyrë do të tërheqë vëmendjen maksimale. Ai do të qëndrojë edhe nesër, kur do t’i vijë radha zv.presidentit Vance të flasë, por Donald Trump do të mbajë gjithsesi fjalimin përmbyllës.
Të gjithë figurat kryesore të administratës do të marrin pjesë, me synimin për të kujtuar ato që kreu i Shtëpisë së Bardhë i konsideron arritjet e tij të mëdha, nga emigracioni te tarifat doganore. Më pas do të jenë kandidatët nga distriktet dhe shtetet më të lëkundura, 35 sipas përllogaritjeve të Trumpit, të cilët shpresojnë të përfitojnë nga shkëlqimi i tij politik.
Një sfidë vendimtare do të jetë pikërisht ajo për vendin e senatorit të Teksasit, ku demokrati i ri Talarico po sfidon republikanin Paxton.
Nëse do të arrinte të fitonte, jo vetëm që do t’i hiqte GOP-it një vend kyç për të ruajtur shumicën në dhomën e lartë të Kongresit, por do të krijonte edhe përshtypjen e një shembjeje të republikanëve, e cila do të ishte e rrezikshme edhe në perspektivën e zgjedhjeve presidenciale të vitit 2028.
Nuk mungojnë as mbështetësit e Trumpit që i druhen një efekti “boomerang”. Është e vërtetë se ai mbetet shumë popullor në bazën MAGA dhe shpesh ka përgënjeshtruar parashikimet më pesimiste të sondazheve, por rënia e popullaritetit të tij në rreth 30 për qind rrezikon ta tërheqë drejt fundit të gjithë partinë, në vend që ta ringrejë atë.
