Një ngjarje e rëndë ka ndodhur mesditën e së martës në Tropojë (8 shtator), ku 4 persona punonjës të Ndërmarrjes së Mirëmbajtjes së Bashkisë, kanë rënë në kontakt me energjinë elektrike.
Për pasojë, dy punonjës të bashkisë kanë humbur jetën dhe dy të tjerë kanë mbetur të plagosur si pasojë e kontaktit me energjinë elektrike gjatë kryerjes së punimeve në terren.
Sipas të dhënave të konfirmuara, mes viktimave është punonjësi i Bashkisë Tropojë, Muhamet Sylisufaj, i cili ndërroi jetë në vendngjarje.
Pak më vonë, si pasojë e dëmtimeve të rënda nga goditja elektrike, ka ndërruar jetë në spital edhe punonjësi i dytë. Dy personat e tjerë të përfshirë në incident ndodhen nën kujdesin e mjekëve.
Ngjarja ka ndodhur gjatë kohës kur punonjësit po kryenin ndërhyrje për krasitjen e pemëve që ndodheshin pranë një shtylle të linjës elektrike me tension.
Në vendngjarje kanë mbërritur shërbimet e policisë dhe grupi hetimor për të rindërtuar dinamikën e plotë të incidentit. Hetimet po fokusohen në zbardhjen e procedurave të ndjekura për sigurinë në punë, si dhe për të verifikuar nëse ka pasur koordinim të mëparshëm mes Bashkisë Tropojë dhe ndërmarrjes së shpërndarjes së energjisë elektrike për stakimin e rrymës përpara nisjes së punimeve.
