residenti i Republikës, Bajram Begaj ka dekretuar marrëveshjen e lidhur me Shtetet e Bashkuara të Amerikës, për huanë me vlerë 302 milionë dollarë. Marrëveshja u miratua në Parlament më 27 korrik me 74 votat e socialistëve, pasi opozita vendosi të bojkotonte mbledhjen me argumentin se mazhoranca po shkelte Kushtetutën e duke e kaluar në votim me procedurë të përshpejtuar.
Nga ana e qeverisë nuk kanë dhënë detaje mbi përmbajtjen e marrëveshjes, pasi e cilësojnë si sekret shtetëror, megjithatë, mësohet se bisedimet mes Shqipërisë dhe Shteteve të Bashkuara kanë nisur që në vitin 2024. Në Parlament u tha se kredia do të përdoret për blerjen e armëve të prodhuara në SHBA. Shqipëria synon të marrë pajisje dhe sisteme luftarake, madje disa prej tyre edhe ofensive. Sipas marrëveshjes, dy vitet e para lihen si një dritare kohore për të negociuar llojet e pajisjeve dhe sasinë që synohet të blihet, pavarësisht se ky moment konsiderohet thuajse i ezauruar që gjatë bisedimeve paraprake.
Kredia do të lëvrohet pjesë-pjesë, sipas kontratave të blerjeve, të cilat do të duhet të përmbyllen brenda 4 vitesh. Vetë kredia ka një kohëzgjatje prej 12 vitesh dhe do të jetë me një interes që luhatet mes 4 dhe 5 përqind. Por nga ana tjetër ajo parashikon që të mund të shlyhet edhe përpara kohe, pa penalitete.
