Është zbuluar një pjesë e misterit të trupit të dekompozuar, të gjetur brenda një valixheje në Kypseli, Greqi, më 18 korrik.
Ajo është një grua britanike, e lindur në shkurt të vitit 1988.
Ekzaminimi i ADN-së nuk përcaktoi nëse trupi i përkiste një personi të zhdukur.
Autoritetet, nga hetimet e para që kanë kryer, kanë konstatuar se gruaja kishte mbërritur në Greqi përmes Qipros. Kjo u ka dhënë hetuesve një pikënisje konkrete, ndërsa oficerët e policisë greke kanë nisur mbledhjen e provave dhe informacioneve.
Fillimisht, ata synojnë të verifikojnë nëse gruaja udhëtonte e shoqëruar atë ditë, gjë që pritet të konfirmohet nga kompania ajrore. Gjithashtu, po hetohet nëse ajo kishte bërë ndonjë rezervim hoteli ose kishte marrë me qira një banesë në Athinë gjatë periudhës në fjalë.
Konsiderohet e sigurt se autoritetet greke do t’i drejtohen edhe Policisë së Qipros, e cila, nga ana e saj, do të mbledhë të dhëna që pritet të jenë të vlefshme për zbardhjen e krimit. Sipas të dhënave paraprake, shtetasja britanike ka të ngjarë të ketë jetuar në Shtetet e Bashkuara, ku mund të jenë të regjistruara edhe të dhënat e saj biometrike.
Kujtojmë se trupi u gjet brenda një valixheje, më 18 korrik, në një ndërtesë të braktisur në Kypseli. Kjo valixhe u gjet nga një i pastrehë, i cili njoftoi autoritetet.
Burri ndodhej në këtë zonë pasi po kërkonte një vend për tu strehuar, por ndjeu një erë të fortë e të pakëndshme. Kështu, duke ndjekur aromën, ai gjeti valixhen, nga e cila dukej një këmbë njeriu. Pas kësaj, ai njofoti menjëherë policinë.
Trupi ishte i mbështjellë me një qese dhe ishte futur me forcë brenda valixhes, por nuk janë konstatuar plagë apo shenja të dukshme dhune. Koha e vdekjes vlerësohet të ketë qenë rreth 6-7 ditë para zbulimit.
