Seanca në Gjykatën e Posaçme për çështjen ndaj Ilir Metës dhe Monika Kryemadhit është shoqëruar me debate mes të pandehurve dhe prokurorit të SPAK.
Kryemadhi kërkoi nga SPAK që t’i vendosen në dispozicion të gjitha procesverbalet e mbajtura për ekspertimin e telefonit celular. “Duke pasur parasysh, që 90 % e dosjes është me mesazhet telefonike, e kam kërkuar këtë edhe në shqyrtimin paraprak, por nuk më janë vendosur. Duke mos i pasur më është cenuar e drejta për mbrojtje. As analiza financiare nuk ka u vu në dispozicion pasi u krye, por vetëm në muajin gusht. Provat na i japin me pikatore. Në dokumentet e mia nuk ekzistojnë këto procesverbale. Unë kam marrë 6 disqe. Madje, në diskun 3 janë disa file që nuk hapen. Unë dua të di, që ky telefon i ekspertuar, mbi bazën e cilit vendim është ekspertuar. Nëse SPAK e ka, të na e vendosë në dispozicion. Ne në çdo seancë na del nga një provë tjetër”, tha Kryemadhi.
Prokurori Sotir Kllapi deklaroi se të gjitha vendimet janë në fashikullin e vendosur në dispozicion të gjykatës. “Ne nuk e dimë që telefoni iPhone është i zonjës Kryemadhi (Meta qesh me të madhe në kafaz). Ne e kemi gjetur në banesën e zonjës Fatime Kryemadhi. Avokate e Kryemadhit: Ne jemi njoftuar për akt-ekspertimin kontabël, por nuk jemi njoftuar për vendim të akt-ekspertimit të telefonit, nëse ka një vendim të tillë”, tha prokurori.
“Akuza është shumë seksiste. Për çdo veprim e paskam bërë unë. Pra, del që unë paskam qenë shërbëtorja”, iu përgjigj Kryemadhi.
“Unë e di, që ky proces do të zgjasë. Unë do e ndjek gjithë procedurën. Pra, cili është vendimi juaj, që do ekspertojmë telefonin e Monika Kryemadhit. Unë dua këtë vendim. Në referencat e CD-ve të mia, unë nuk kam numra fashikujsh. Çdo provë që marr mua më ndryshon kronologjia. Kjo është një çështje që mund ta zgjidh vetëm unë, nuk ma zgjidh as Ilir Meta, as avokatët”.
