Kryeministri izraelit Benjamin Netanyahu ka paralajmëruar Iranin se opsioni ushtarak mbetet i hapur, në një kohë kur negociatat mes Shteteve të Bashkuara dhe Teheranit për programin bërthamor iranian vazhdojnë të jenë në ngërç.
Në një intervistë për CNBC, Netanyahu deklaroi se udhëheqja iraniane “po luan me zjarrin” dhe duhet të marrë seriozisht pasojat e veprimeve të saj.
“Irani e di shumë mirë qëndrimin e presidentit Trump. Nëse do të jetë e nevojshme, operacionet ushtarake mund të rifillojnë. Izraeli është i gatshëm dhe po ashtu edhe forcat amerikane”, tha ai.
Kreu i qeverisë izraelite theksoi se Teherani përbën një kërcënim jo vetëm për Izraelin, por edhe për Shtetet e Bashkuara dhe demokracitë perëndimore.
“Po përballemi me një armik që kërkon të shkatërrojë vendin tonë, vendin tuaj dhe demokracitë e lira në mbarë botën”, u shpreh Netanyahu.
Marrëdhëniet me Trump
Netanyahu hodhi poshtë zërat për përçarje në marrëdhëniet me presidentin amerikan Donald Trump, duke theksuar se pavarësisht mosmarrëveshjeve të herëpashershme taktike, të dy ndajnë të njëjtin objektiv strategjik: pengimin e Iranit për të siguruar armë bërthamore.
“Ashtu si në familjet më të mira, ndonjëherë ka mosmarrëveshje. Por ne gjithmonë gjejmë mënyrën për t’i kapërcyer si miq të mirë”, deklaroi ai.
Sipas Netanyahut, ai komunikon me Trumpin rregullisht, madje “një herë në dy ditë”.
Mbështetje për presionin ndaj Iranit
Kryeministri izraelit shprehu gjithashtu mbështetjen për politikat amerikane ndaj Iranit në Ngushticën e Hormuzit, duke vlerësuar si efektive strategjinë e rritjes së presionit ekonomik dhe politik ndaj Teheranit.
Ai shtoi se pret që regjimi aktual iranian të dobësohet më tej, megjithëse nuk dha një afat se kur mund të ndodhë një ndryshim politik në vend.
Thirrje për çarmatimin e Hezbollahut
Netanyahu deklaroi se ndan me administratën amerikane objektivin për çarmatimin e Hezbollahut dhe demilitarizimin e Libanit.
“Nëse duam të shpëtojmë Libanin dhe të arrijmë paqe mes Libanit dhe Izraelit, atëherë Hezbollahu duhet të çarmatoset”, tha ai.
Kritika ndaj liderëve evropianë
Kryeministri izraelit kritikoi gjithashtu disa liderë evropianë për qëndrimin e tyre ndaj operacioneve ushtarake të Izraelit.
Sipas tij, disa qeveri evropiane po shmangin mbështetjen e hapur për Izraelin për shkak të presionit politik të brendshëm.
“Është e turpshme mënyra se si disa liderë evropianë përpiqen të kënaqin grupet radikale islamike në vendet e tyre”, deklaroi Netanyahu.
