Një tragjedi e rëndë tronditi Manhattanin mbrëmjen e së hënës, ku 56-vjeçarja Donika Gocaj humbi jetën pasi ra në një puset të hapur pranë Fifth Avenue dhe East 52nd Street.
Sipas policisë dhe dëshmitarëve, Donika sapo kishte dalë nga makina e saj tip Mercedes-Benz SUV, kur bëri disa hapa dhe u rrëzua në një puset rreth 3 deri në 4.5 metra të thellë, që ndodhej e pambuluar në mes të rrugës.
“Ajo bërtiste vazhdimisht: ‘Po vdes, po vdes’”, tregoi një dëshmitar okular, Carl Wood, i cili ndodhej pranë vendit të ngjarjes dhe telefonoi menjëherë emergjencën.
Sipas tij, pranë pusit nuk kishte asnjë kon sigurie, barrikadë apo shenjë paralajmëruese.
Ekipet e emergjencës mbërritën brenda pak minutash dhe e nxorën Donikën pa ndjenja nga puseta. Ajo u transportua me urgjencë në spital, por nuk arriti t’u mbijetojë plagëve të marra.
Hetimet paraprake dyshojnë se kapaku i pusetës mund të jetë zhvendosur nga një kamion i rëndë vetëm pak minuta para tragjedisë. Kompania Con Edison deklaroi se po shqyrton pamjet e kamerave të sigurisë për të kuptuar saktësisht çfarë ndodhi.
Dëshmitarët thanë se në fund të pusit kishte avull dhe ujë shumë të nxehtë, ndërsa zjarrfikësit përdorën maska speciale gjatë operacionit të shpëtimit.
Ngjarja ka shkaktuar reagime të forta në New York, ndërsa shumë qytetarë dhe punëtorë të zonës shprehën habi se si një pusetë mund të lihej e hapur pa asnjë masë sigurie.
