Shumë njerëz mund ta njohin ndjesinë e emocionit kur zbulojnë një “perlë të fshehur”, shkruan media botërore BBC News.
Këtë vit, më shumë njerëz po kërkojnë përvoja pushimesh “autentike” jashtë vendit, në vend të paketave turistike gjithëpërfshirëse, sipas ABTA, shoqata e agjentëve britanikë të udhëtimit.
ABTA thotë gjithashtu se dy në pesë britanikë planifikojnë të bëjnë pushime në një vend ku nuk kanë qenë kurrë më parë këtë vit.
Kjo vjen në një kohë kur lufta në Lindjen e Mesme po bën që disa të zgjedhin destinacione europiane, ndërsa paralajmërimet për mungesa të mundshme të karburantit për avionë dhe kostoja e lartë e jetesës po i dekurajojnë të tjerë nga pushimet fare.
Pra, nëse po kërkoni një destinacion ekonomik dhe paksa ndryshe për këtë verë, lexoni më poshtë për ato që po bëhen më të njohura.
Mali i Zi (Montenegro)
Mali i Zi po shfaqet gjithnjë e më shumë në rrjetet sociale si një “perlë e fshehur” turistike.
Shteti ballkanik tani lidhet me disa linja ajrore nga Mbretëria e Bashkuar dhe është i preferuar nga ata që duan të vizitojnë Greqinë, Italinë dhe Kroacinë – por pa kaluar gjithë pushimet aty.
Për shkak se Mali i Zi është i vogël, turistët mund të kombinojnë pushime në plazh, vizita në qytet dhe aktivitete në natyrë, shpjegon Jennifer Lynch, drejtoreshë e agjencisë së udhëtimeve “Arrange My Escape”.
“Nëse jeni në një resort plazhi, mund të bëni një udhëtim ditor në male,” thotë ajo.
“Mund të bëni ture me tren nëpër Malin e Zi dhe ta kombinoni edhe me Bosnjën dhe Kroacinë.”
Jennifer thotë se nuk është një destinacion tradicional për pushime familjare, por ka paketa për tipa aventurierë. Ajo vlerëson se një paketë familjare 8-ditore kushton rreth 1,825 paund për person.
Disa të rinj po e zgjedhin gjithnjë e më shumë këtë vend për pushime dhe po ndajnë përvojat e tyre në TikTok.
Blogerja e udhëtimeve Em thotë se Mali i Zi ofron vlerë të mirë për paratë.
“Ishte si Kroacia, por më lirë,” thotë ajo.
“Një kombinim mes pushimeve në qytet dhe në plazh.
Ishte ndoshta një nga vendet e para që më ndezi pasionin për udhëtimet.”
Bregdeti Baltik
Estonia, Finlanda dhe Lituania po bëhen destinacione gjithnjë e më të njohura për familje, çifte dhe udhëtarë solo.
Ashtu si Mali i Zi, këto tre vende janë të lehta për t’u vizituar mes tyre kryeqyteti finlandez Helsinki dhe ai estonez Tallinn lidhen me traget.
Deti Baltik ofron pushime bregdetare për ata që nuk duan temperaturat përvëluese të Spanjës apo zonave të brendshme. Temperatura në Tallinn zakonisht është rreth 21°C në korrik, por qyteti mund të goditet nga reshje të dendura shiu.
Dashamirësit e historisë mund të tërhiqen nga Lituania, e cila ka pesë vende të trashëgimisë botërore të UNESCO-s.
Gjithashtu në këtë zonë ndodhet “Riviera gjermane”. Ishulli Rügen, më i madhi në Gjermani, është i njohur për turistët vendas me shkëmbinjtë e bardhë, parqet kombëtare dhe fshatrat e paprekur të peshkimit. Ndodhet tre orë larg Berlinit me tren.
Disa mund të hezitojnë për një udhëtim treorësh me tren pas fluturimit nga Britania, por Emma Brennan nga ABTA thotë se gjithnjë e më shumë njerëz po e shohin vetë udhëtimin si pjesë të pushimit.
“Sapo nis udhëtimi, po eksploron vende të reja, bën ndalesa gjatë rrugës dhe e përjeton më thellë destinacionin,” thotë ajo.
Rügen është një shembull i turistëve që kërkojnë përvoja më “autentike”, larg qyteteve klasike turistike.
Steph Jepson nga “Courtney World Travel” thotë se lufta në Lindjen e Mesme po i shtyn disa klientë drejt Europës veriore për t’u ndjerë më të sigurt.
“Aktualisht kemi klientë që janë të shqetësuar për Qipron, çka është për të ardhur keq pasi turizmi është industria e tyre kryesore.”
Ajo vlerëson se një paketë 7-ditore “all-inclusive” në Tallinn për një çift në qershor kushton rreth 1,800 paund, ndërsa një familje me katër persona rreth 3,400 paund.
Shqipëria
Në Shqipëri, është e lehtë ta bësh udhëtimin pjesë të pushimit.
“Mund të fluturoni për në Korfuz (Greqi), pastaj të merrni një traget 30-minutësh për në Sarandë, që është hyrja për në ‘Rivierën Shqiptare’,” shpjegon blogerja Amber Robertson.
Ajo ka vënë re një rritje të vazhdueshme të interesit për guidën e saj për Shqipërinë vitet e fundit.
“Këtu ke plazhe shumë të bukura, beach clubs të mira, një ndjesi si në Greqi por me çmime më të ulëta.”
“Dhe pastaj ke edhe histori shumë interesante,” thotë ajo.
“Berati dhe Gjirokastra, qytete të vjetra prej guri me shumë kulturë.”
Jepson vlerëson se një paketë 7-ditore “all-inclusive” për një çift në atë që quhet “Maldivet e Europës” kushton rreth 1,400 paund, ndërsa një familje me katër persona rreth 2,300 paund.
“Një nga arsyet kryesore, sidomos për të rinjtë, është vlera paratë shkojnë më larg këtu,” thotë ajo.
“Shqipëria ka edhe faunë shumë interesante, gjë që tërheq familje dhe njerëz me interesa specifike.”
Spanja Veriore
Screenshot
Spanja mbetet destinacioni më popullor për turistët britanikë, sipas ABTA, por gjithnjë e më shumë njerëz po eksplorojnë përtej Barcelonës apo Costa del Sol.
Brennan thotë se Asturias dhe La Rioja po bëhen më të njohura, pjesërisht falë përpjekjeve të qeverisë spanjolle për të shpërndarë turizmin në të gjithë vendin.
“Është një ofertë shumë ndryshe atje. Ke ende plazhe, por edhe gjelbërim, male dhe jetë të egër.”
Anëtarët e ABTA raportojnë se gjithnjë e më shumë pushues po planifikojnë udhëtimet bazuar në interesa specifike, si ushqimi dhe vera.
Robertson thotë se nuk ka asgjë të keqe të zgjedhësh destinacione klasike, por disa zona të Spanjës janë një alternativë e mirë mes turizmit të zakonshëm dhe diçkaje më ndryshe.
“Vende si San Sebastián dhe Bilbao janë ende turistike deri diku, por shumë më pak se Barcelona,” thotë ajo.
